പോയതല്ലടീ പെണ്ണേ, വിളിച്ചതാണ്; ആ മനോഹര ചോദ്യത്തിന് മറുപടിയെത്തി; ഫെയ്‌സ്ബുക്ക് പോസ്റ്റ് വൈറല്‍

അനുപ് നാരായണന്‍ സംവിധാനം ചെയ്ത ‘എന്റെ ഹൃദയത്തിന്റെ വടക്ക് കിഴക്കേ അറ്റത്ത്’ എന്ന ഹ്രസ്വചിത്രമാണ് ഇപ്പോള്‍ സോഷ്യല്‍ മീഡിയകളില്‍ വൈറലായിരിക്കുന്നത്. സ്വന്തമാക്കുമ്പോഴല്ല, മറിച്ച് ഹൃദയത്തിന്റെ ഒരു കോണില്‍ മരണം വരെ സൂക്ഷിച്ച് വെയ്ക്കുമ്പോഴാണ് ചില ഇഷ്ടങ്ങള്‍ മനോഹരമാകുന്നതെന്ന് ആ കൊച്ചു ചിത്രം പറയാതെ പറയുന്നു.

ഇപ്പോഴിതാ, വൈറലായ ഷോര്‍ട്ട് ഫിലിമിനു മറുപടി എന്ന രീതിയില്‍ ഫാ. ജോസ് പുതുശ്ശേരിയുടെ വാക്കുകള്‍ വൈറലാകുന്നു. ഫാ. അനീഷ് ആണ് ഇദ്ദേഹത്തിന്റെ വരികള്‍ ഫെയ്‌സ്ബുക്കില്‍ ഷെയര്‍ ചെയ്തിരിക്കുന്നത്.

ഫാ. അനീഷ് കരിമാളൂരിന്റെ ഫെയ്‌സ്ബുക്ക് പോസ്റ്റ്:

എന്തിനാടാ ചക്കരേ നീ അച്ചന്‍ പട്ടത്തിന് പോയത്???????
സുന്ദരിയായ ഒരു കൊച്ചുമിടുക്കി അവള്‍ക്ക് പ്രണയം തോന്നിയ ഒരു കൊച്ചച്ചനോട് ചോദിച്ച നല്ല ചന്തമുള്ള ചോദ്യമാണ്. ചില ഉത്തരങ്ങളുടെ പ്രസക്തി അതിന്റെ ചോദ്യങ്ങളിലാണെന്ന് എനിക്ക് തോന്നിയിട്ടുണ്ട്. അതുകൊണ്ട് മാത്രം ആ പ്രണയിനിക്ക് ഒരു ഉത്തരം കൊടുത്താലോ എന്നു വിചാരിച്ചു.

‘എന്തിനാടാ ചക്കരേ നീ അച്ചന്‍ പട്ടത്തിന് പോയത്?’
ഒറ്റവാക്കില്‍ പറഞ്ഞാല്‍,
പോയതല്ലടീ പെണ്ണേ, വിളിച്ചതാണ്…
ഞാന്‍ പോലും അറിയാതെ,
പിറകേ നടന്ന്,
ഊണിലും, ഉറക്കത്തിലും
കളിയിലും, കനവിലും കയറി വന്ന്
അവന്‍ വന്നു വിളിച്ചു കൊണ്ടുപോയതാണ്…
അമ്മയുടെ മടിത്തട്ടിലൂടെ, അപ്പന്റെ നെറ്റിയിലെ വിയര്‍പ്പിലൂടെ, കൊച്ചു പെങ്ങളുടെ ‘ചേട്ടാ’ വിളിയിലൂടെ, ചങ്കിന്റെ ‘ബ്രോ’ വിളിയിലൂടെ, അച്ചന്റെ ശാസനത്തിലൂടെ, കന്യാസ്ത്രിയമ്മയുടെ തിരുത്തലിലൂടെ,
പാട്ടിലൂടെ, പ്രസംഗത്തിലൂടെ, നാടകത്തിലൂടെയൊക്കെ വിളിച്ചത് അവനായിരുന്നടീ…
ഇത് പറയുമ്പോ
അനുവാദം കൂടാതെ കയറി വന്ന് വിളിച്ചോണ്ടു പോയി എന്ന സങ്കടമൊന്നുമല്ലട്ടോടീ പെണ്ണേ
മറിച്ച്,
വിളി കിട്ടിയാല്‍ മാത്രം യാത്ര ചെയ്യാനും
മുഴുമിപ്പിക്കാനും കഴിയുന്ന
യാത്രയാണിതെന്ന് നിന്നോട് പറയാനാണ്.
ഈ വഴിയില്‍ നടക്കണമെന്ന കൊതിയോടെ
ചെരുപ്പും മാറാപ്പുമൊക്കെ എടുത്ത് ‘പോയ’
ഒത്തിരി പേരുണ്ട്,
പക്ഷേ, അവസാന ലാപ്പില്‍ എത്തുമ്പോ
കല്യാണക്കുറി കാണിക്കണം,
അതായത്, വിളിച്ചിട്ടുണ്ടാവണം എന്ന് ചുരുക്കം…

ഇനി കസന്‍ദ് സാക്കിസിന്റെ ഫ്രാന്‍സീസിനെ കുറിച്ചുള്ള പ്രണയാര്‍ദ്രമായ ഒരു സ്വപ്നം കൂടി കുറിച്ചിട്ട് ഞാന്‍ നിറുത്തിയേക്കുവാണേ,,,
പ്രണയത്തിലായിരുന്നു ഫ്രാന്‍സീസും ക്ലാരയും. പൊടുന്നനെ ഒരു ദിനം ഫ്രാന്‍സീസ് ചുവടുമാറുന്നതായി ക്ലാരയ്ക്ക് ഒരു സംശയം. അവനില്‍ ആദ്യം ഉണ്ടായിരുന്ന പ്രണയം നുരയുന്നില്ല, തന്നേക്കാളധികം മറ്റാരോടോ ഉള്ള അനുരാഗം അവനില്‍ സ്ഫുരിക്കുന്നുണ്ട്, തുടങ്ങിയ ഒത്തിരി ആശങ്കകള്‍. അനാവശ്യമായ തെറ്റിദ്ധാരണകള്‍ക്കിടം നല്‍കാതെ ക്ലാര ചോദ്യം ഫ്രാന്‍സീസിനോട് തന്നെ ചോദിക്കുകയാണ്. എന്തുകൊണ്ടാണ് നിനക്ക് എന്നോട് ആദ്യം ഉണ്ടായിരുന്ന പ്രണയം ഇല്ലാത്തത്? അതോ, നിനക്ക് മറ്റാരോടെങ്കിലും പ്രണയം തേന്നുന്നുണ്ടോ എന്നൊക്കെ?

ഫ്രാന്‍സീസില്‍ നിന്ന് ക്ലാര പ്രതീക്ഷിച്ച ഉത്തരത്തെക്കാളുപരി , അവളുടെ സകല സ്വപ്നങ്ങളേയും തകര്‍ക്കുന്ന ഒരു ഉത്തരമാണ് ഫ്രാന്‍സീസിന്റെ നാവില്‍ നിന്നും വീണത്.

അവന് പ്രണയം തോന്നിയിരിക്കുന്നു. ഇന്നലെ വരെ തന്റെ പ്രണയകവാടത്തിന്റെ കാവല്‍ക്കാരനായിരുന്നവന്‍ ഇന്ന് മറ്റാരുമായോ അനുരാഗത്തിന്റെ കനവുകള്‍ക്ക് നിറമേകുന്നതില്‍ വ്യാപൃതനാണ്.

കൂടുതല്‍ വ്യക്തതയാഗ്രഹിച്ച ക്ലാരയോട് ഫ്രാന്‍സീസ് പറഞ്ഞു.
അതേ, ഞാന്‍ പ്രണയത്തിലാണ്,തീവ്രാനുരാഗത്തിലാണ്.
എന്നെ സൃഷ്ടിച്ച് പരിപാലിക്കുന്ന എന്റെ ദൈവത്തോട്…
നിന്റെ പ്രണയം എന്റെ ഇരുള്‍ വീണ നടവഴികളില്‍
ഒരു മിന്നാമിനുങ്ങിന്റെ വെട്ടം തന്നിട്ടുണ്ട് എന്നത് സത്യമാണ്.

എന്നാല്‍,എന്റെ ദൈവം സൂര്യനെപ്പോലെ എന്റെ മുന്‍പില്‍ ഉദിച്ചു നില്‍ക്കുമ്പോള്‍
ഈ മിന്നാമിനുങ്ങിന്റെ നുറുങ്ങുവെട്ടത്തിന് തീര്‍ത്തും പ്രസക്തിയില്ലാതായിപ്പോകുന്നു…
കടലോളം പ്രണയമുള്ളവളേ,
നിന്നോടും നിന്റെ പ്രണയത്തോടുള്ള മതിപ്പോടും കൂടി തന്നെ
ഒരിക്കല്‍ കൂടി കുറിക്കട്ടെ,
പോയതല്ലടീ പെണ്ണേ, വിളിച്ചതാണ്,,,
പ്രണയം തന്നെയായ ദൈവം……

Top