ആശങ്കയോടെ പെരുമ്പാവൂര്‍ ;അഴിഞ്ഞാടി ഇതരസംസ്ഥാനക്കാര്‍

പെരുമ്പാവൂര്‍: രണ്ട് വര്‍ഷം മുമ്പ് നിയമവിദ്യാര്‍ഥിനി ഇതരസംസ്ഥാന തൊഴിലാളിയുടെ കൈകളാല്‍ ക്രൂരമായി കൊല്ലപ്പെട്ട സംഭവത്തിന്റെ ഞെട്ടലില്‍ നിന്നും ഇന്നും പെരുമ്പാവൂര്‍ മുക്തരായിട്ടില്ല. അതിന് പിന്നാലെയാണ് കോളെജ് വിദ്യാര്‍ഥിനിയെ മറ്റൊരു ഇതരസംസ്ഥാന തൊഴിലാളി കഴുത്തറത്ത് കൊലപ്പെടുത്തിയെന്ന വാര്‍ത്തയുടെ വരുന്നത്. പെരുമ്പാവൂരിലാണ് കേരളത്തില്‍ ഏറ്റവും കൂടുതല്‍ ഇതരസംസ്ഥാന തൊഴിലാളികള്‍ താമസിക്കുന്നത്. അതുകൊണ്ട് തന്നെ പെരുമ്പാവൂരിനും ചുറ്റുപാടുമുള്ള പ്രദേശങ്ങളിലുമുള്ളവര്‍ ആശങ്കയിലാണ്.

നിരവധി പ്ലൈവുഡ് കമ്പനികള്‍ പ്രവര്‍ത്തിക്കുന്ന പെരുമ്പാവൂരില്‍ ഒട്ടേറെ ഇതരസംസ്ഥാന തൊഴിലാളികളാണ് സ്ഥിരതാമസക്കാരായുള്ളത്. ഇവര്‍ക്കിടയില്‍ ഇത്തരം ക്രിമിനല്‍ സ്വഭാവമുള്ളവരും ഏറെയുണ്ടെന്നതാണ് വസ്തുത. നിയമ വിദ്യാര്‍ഥിനിയുടെ കൊലപാതകത്തിന്റെ നടുക്കുന്ന ഓര്‍മ്മകള്‍ മായുന്നതിന് മുമ്പേയാണ് പെരുമ്പാവൂരിനെ ഞെട്ടിച്ച് സമാനരീതിയിലുള്ള മറ്റൊരു കൊലപാതകവും സംഭവിച്ചിരിക്കുന്നത്. വാഴക്കുളം എം.ഇ.എസ് കോളെജ് വിദ്യാര്‍ഥി നിമിഷയാണ് വീട്ടില്‍ കൊല്ലപ്പെട്ടത്. സംഭവവുമായി ബന്ധപ്പെട്ട് മൂര്‍ഷിദാബാദ് സ്വദേശിയായ ബിജുവിനെ പൊലീസ് അറസ്റ്റ് ചെയ്തു. ഇയാള്‍ പെരുമ്പാവൂരിലെ എ.കെ ഫ്‌ളവേഴ്‌സ് എന്ന കടയില്‍ ജോലി നോക്കി വരികയായിരുന്നു.

നിമിഷയുടെ മുത്തശിയുടെ കഴുത്തില്‍ കിടന്ന മാല ബിജു പൊട്ടിക്കാന്‍ ശ്രമിച്ചു. ഇത് തടയാന്‍ ശ്രമിക്കുന്നതിനിടെയാണ് ബിജു നിമിഷയെ കുത്തിയത്. നിമിഷയെ ആക്രമിക്കുന്നത് തടയാന്‍ ശ്രമിക്കുന്നതിനിടെയാണ് പിതാവ് തമ്പിക്ക് പരിക്കേറ്റത്. കഴുത്തില്‍ കുത്തേറ്റ നിമിഷ കുഴഞ്ഞുവീണു. നിമിഷയുടെ കരച്ചില്‍ കേട്ട് നാട്ടുകാര്‍ ഓടിയെത്തുകയും ബിജുവിനെ പിടികൂടി പൊലീസില്‍ ഏല്‍പ്പിക്കുകയുമായിരുന്നു. നിമിഷയെ ഉടന്‍ തന്നെ ആശുപത്രിയില്‍ എത്തിച്ചെങ്കിലും മരണം സംഭവിച്ചു.

നിയമ വിദ്യാര്‍ഥിനിയെ 2016 ഏപ്രില്‍ 28നാണ് പെരുമ്പാവൂരിലെ വീട്ടിനുള്ളില്‍ കൊല്ലപ്പെട്ട നിലയില്‍ കണ്ടെത്തിയത്. പെണ്‍കുട്ടി ക്രൂരമായ ബലാത്സംഗത്തിനും ഇരയായിരുന്നു. 2016 ജൂണ്‍ 14ന് കേസിലെ പ്രതി അസം സ്വദേശിയായ അമീറുള്‍ ഇസ്ലാമിനെ കേരളതമിഴ്‌നാട് അതിര്‍ത്തിയില്‍ നിന്ന് പൊലീസ് അറസ്റ്റ് ചെയ്തു. മാസങ്ങള്‍ നീണ്ട വിചാരണയ്ക്ക് ഒടുവില്‍ പ്രതിക്ക് വധശിക്ഷയും വിധിച്ചു.

Top