പാലക്കാട്: എല്‍ഡിഎഫ് സ്ഥാനാര്‍ത്ഥിയുടെ മകനെ തലയ്ക്ക് വെടിയേറ്റ് മരിച്ച നിലയില്‍ കണ്ടെത്തി.പാലക്കാട് കന്നിമാരിയിലെ വനിതാ സ്ഥാനാര്‍ത്ഥി കല്ല്യാണിക്കുട്ടിയുടെ മകനെയാണ് വെടിയേറ്റ നിലയില്‍ കണ്ടെത്തിയത്. കല്ല്യാണിക്കുട്ടിയുടെയും രാജന്റെയും മകനായ അജിത്തിനെയാണ് മരിച്ച നിലയില്‍ കണ്ടെത്തിയത്. അജിത്തിന്റെ മൃതദേഹത്തിനടുത്ത് നിന്നും പോയന്റ് 315 റൈഫിളും പൊലീസ് കണ്ടെടുത്തിട്ടുണ്ട്.
ആത്മഹത്യയെന്നാണു പ്രാഥമിക നിഗമനമെങ്കിലും സ്ഥിരീകരിച്ചിട്ടില്ല. രാജന്‍റെ ഉടമസ്ഥതയിലുള്ളതാണ് തോക്ക്. ചിറ്റില്ലഞ്ചേരിയില്‍ സ്വകാര്യ ഡി അഡിക്ഷന്‍ കേന്ദ്രത്തില്‍ ചികിത്സയിലായിരുന്ന അജിത്ത് നാലുദിവസം മുന്പാണ് വീട്ടിലെത്തിയതെന്നു പോലീസ് പറഞ്ഞു.പട്ടഞ്ചേരി പഞ്ചായത്ത് പത്താംവാര്‍ഡിലെ എല്‍ഡിഎഫ് സ്ഥാനാര്‍ഥിയാണ് കല്യാണിക്കുട്ടി. കല്യാണിക്കുട്ടിയും രാജനും തിങ്കളാഴ്ച തെരഞ്ഞെടുപ്പ് പ്രചാരണത്തിന് പോയി വൈകിട്ട് മടങ്ങിയെത്തിയപ്പോഴാണ് മകന്‍റെ മൃതദേഹം കണ്ടത്. മീനാക്ഷിപുരം പോലീസ് സ്ഥലത്തെത്തി വീട് മുദ്രവച്ചു.
