കേരളത്തില്‍ 164 സഹകരണ സ്ഥാപനങ്ങള്‍ നഷ്ടത്തില്‍; നിക്ഷേപം തിരിച്ചുകൊടുക്കാന്‍ കഴിയുന്നില്ല

തിരുവനന്തപുരം. 164 സഹകരണ സ്ഥാപനങ്ങള്‍ കേരളത്തില്‍ നഷ്ടത്തിലാണ് പ്രവര്‍ത്തിക്കുന്നതെന്ന് സഹകരണ മന്ത്രി വിഎന്‍ വാസവന്‍ നിയമസഭയില്‍ പറഞ്ഞു. നിക്ഷേപങ്ങള്‍ സ്വീകരിച്ച ശേഷം കാലാവധി കഴിഞ്ഞ് തിരിച്ച് കൊടുക്കുവാന്‍ കഴിയാത്ത സഹകരണ സംഘങ്ങളാണ് നഷ്ടത്തിലാണെന്ന് കണക്കാക്കുന്നത്.

കെകെ ആബിദ് ഹുസൈന്‍ തങ്ങള്‍ എംഎല്‍എയുടെ ചോദ്യത്തിനാണ് സകരണ മന്ത്രി വിഎന്‍ വാസവന്റെ മറുപടി. നഷ്ടത്തില്‍ പ്രവര്‍ത്തിക്കുന്ന സഹകരണ സംഘങ്ങളുടെ ജില്ല അടിസ്ഥാനമാക്കിയ കണക്കും മന്ത്രി നിയമസഭയെ അറിയിച്ചു.

Loading...

ഏറ്റവും കൂടുതല്‍ സഹകരണ സംഘങ്ങള്‍ നഷ്ടത്തില്‍ പ്രവര്‍ത്തിക്കുന്ന ജില്ല തിരുവനന്തപുരമാണ്. ജില്ലയില്‍ 37 സഹരണ സംഘങ്ങള്‍ നഷ്ടത്തില്‍ പ്രവര്‍ത്തിക്കുന്നു. കൊല്ലം ജില്ലയില്‍ 12, ആലപ്പുഴ, പത്തനംതിട്ട ജില്ലകളില്‍ 15, കോട്ടയത്ത് 22, തൃശൂര്‍ ജില്ലയില്‍ 11, മലപ്പുറത്ത് 12 എന്നിങ്ങനെയാണ് കണക്ക്.

കരുവന്നൂരില്‍ സഹകരണ ബാങ്കില്‍ നിക്ഷേപിച്ച പണം തിരികെ കിട്ടാഞ്ഞതോടെ ചികിത്സ ലഭിക്കാതെ സ്ത്രീ മരിച്ചത് വിവാദമായതിന് പിന്നാലെയാണ് നിയമസഭയില്‍ ചോദ്യം വന്നത്. ഇത് സംബന്ധിച്ച് മന്ത്രിയുടെ വെളിപ്പെടുത്തല്‍ നിക്ഷേപകര്‍ക്ക് വലിയ ആശങ്കയാണ് നല്‍കുന്നത്.