ഭാര്യയുമായി വഴക്കിട്ടു, ഓട്ടോ ഡ്രൈവർ വണ്ടിയിൽ ഇരുത്തി മകളേ വിഷം കുടിപ്പിച്ച് അയാളും വിഷം കുടിച്ചു

പത്തനംതിട്ട: ഭാര്യയുമായി പിണങ്ങി വീട്ടിൽ നിന്നും പോന്ന ഓട്ടോ ഡ്രൈവർ കാണിച്ചത് കണ്ണില്ലാത്ത ക്രൂരത. 5വയസുകാരി മകളേ ഓട്ടോയിൽ കയറ്റി അവൾക്ക് വിഷം നല്കി അയാളും വിഷം കുടിച്ചു. ഇരുവരും മരിച്ചു.പത്തനംതിട്ട കല്ലറക്കടവ് കിഴക്കേ മട്ടത്തിൽ ആർ. ശ്രീകുമാർ (42), മകൾ അനുഗ്രഹ(അഞ്ച്) എന്നിവരാണ് ഇന്നു രാവിലെ 11 മണിയോടെ മരിച്ചത്.വിഷം അകത്താക്കിയ ശേഷം അവശനിലയിൽ ഇരുവരും മാതാപിതാക്കൾ നടത്തുന്ന ചായക്കടയ്ക്ക് മുന്നിലെത്തി കുഴഞ്ഞു വീണു. തൊട്ടുമുന്നിലുള്ള ആശുപത്രിയിൽ കൊണ്ടുപോയെങ്കിലും പിതാവും മകളും മരിക്കുകയായിരുന്നു.

പത്തനംതിട്ട മുത്തൂറ്റ് ആശുപത്രിക്ക് മുന്നിലുള്ള സ്റ്റാൻഡിലെ ഓട്ടോഡ്രൈവറാണ് ശ്രീകുമാർ. ഇതിന് എതിർവശത്തായി തട്ടുകട നടത്തുകയാണ് പിതാവ് രാജൻ നായരും മാതാവ് ഓമനയും. കടുത്ത സാമ്പത്തിക പ്രതിസന്ധിയിലായിരുന്നു ശ്രീകുമാറെന്ന് പറയപ്പെടുന്നു. ഒരാഴ്ചയായി ശ്രീകുമാർ വീട്ടിൽ വഴക്കുണ്ടാക്കിയിരുന്നു. ഇന്നു രാവിലെയും ഭാര്യയുമായി വഴക്ക് തുടർന്നു.

അതിന് ശേഷം മകളെയും കൂട്ടി രാവിലെ ഒമ്പതരയോടെ വീട്ടിൽ നിന്ന് ഇറങ്ങി. പിന്നെ മുത്തൂറ്റ് ആശുപത്രിക്ക് മുന്നിലുള്ള പിതാവിന്റെ ചായക്കടയുടെ സമീപമാണ് ഇരുവരെയും കണ്ടത്.അവശനിലയിലായിരുന്ന ശ്രീകുമാറും മകൾ അനുഗ്രഹയും ഓട്ടോയിൽനിന്നിറങ്ങി കുഴഞ്ഞുവീഴുകയായിരുന്നു.