എ വിജയരാഘവൻ സിപിഎം പൊളിറ്റ്ബ്യൂറോയിലേക്ക്; എസ് രാമചന്ദ്രൻ പിള്ള ഒഴിയാൻ സാധ്യത

കണ്ണൂർ: സിപിഎം പൊളിറ്റ്ബ്യൂറോയിലേക്ക് എ വിജയരാഘവൻ എത്താൻ സാധ്യത. നിലവിൽ കേന്ദ്ര കമ്മിറ്റി അം​ഗമാണ് എ വിജയരാഘവൻ. മഹാരാഷ്ട്രയിൽ നിന്നും അശോക് ധാവ്ലയും, ആദ്യ ദളിത് പ്രാതിനിധ്യമായി പശ്ചിമ ബംഗാളിൽ നിന്ന് രാമചന്ദ്ര ഡോമും, പിബിയിലെത്താൻ ധാരണയായിട്ടുണ്ട്. എസ് രാമചന്ദ്രൻ പിള്ളയുടെ ഒഴിവിലേക്കാണ്, കേരളത്തിൽ നിന്നും കേന്ദ്ര തലത്തിൽ പ്രവർത്തിക്കാൻ വിജയരാഘവൻ എത്തുന്നത്.

നിലവിൽ, എൽഡിഎഫ് കൺവീനറായ വിജയരാഘവൻ നേരത്ത സിപിഎം സംസ്ഥാന ആക്ടിംഗ് സെക്രട്ടറിയുടെ ചുമതല വഹിച്ചിരുന്നു. എസ് രാമചന്ദ്രൻ പിള്ള, ഹന്നൻ മൊള്ള, ബിമൻ ബോസ്, സൂര്യകാന്ത് മിശ്ര എന്നീ പിബി അംഗങ്ങൾ ഇന്നലെ നടന്ന യോഗത്തിൽ ഒഴിയാൻ സന്നദ്ധത അറിയിച്ചു.പ്രായം പരിഗണിച്ച് എസ് രാമചന്ദ്രൻ പിള്ള പിബിയിൽ നിന്നും ഒഴിയുന്നത് അംഗീകരിക്കപ്പെടും. എന്നാൽ, സൂര്യകാന്ത് മിശ്ര തുടരണമെന്ന താല്പര്യമാണ് നേതൃത്വം പ്രകടിപ്പിച്ചത്. മന്ത്രിമാരായ പി രാജീവും കെ എൻ ബാലഗോപാലും കേന്ദ്ര കമ്മിറ്റിയിലെത്തും.

Loading...