കൊച്ചി : കൊച്ചി അന്താരാഷ്ട്ര വിമാനത്താവളത്തിൽ ഒരു കിലോ മയക്കുമരുന്നുമായി വിദേശ വനിത പിടിയിൽ. ഷാർജയിൽ നിന്ന് കൊച്ചി വിമാനത്താവളത്തിലെത്തിയ ആഫ്രിക്കൻ വനിതയിൽ നിന്നാണ് മയക്കുമരുന്ന് പിടികൂടിയത്. ഇന്ന് പുലർച്ചെ 3.10ന് ഷാർജയിൽ നിന്ന് എയർ ഇന്ത്യ വിമാനത്തിലാണ് യുവതി എത്തിയത്. കെനിയയിൽ നിന്ന് ഷാർജ വഴി കൊച്ചിയിലെത്തിയതെന്നാണ് പ്രാഥമിക നിഗമനം.
രഹസ്യവിവരത്തെത്തുടർന്ന് ഡി ആർ ഐ (ഡയറക്‌ടറേറ്റ് ഒഫ് റവന്യൂ ഇന്റലിജൻസ്) നടത്തിയ പരിശോധനയിലാണ് ഇവർ പിടിയിലായത്. സംഭവവുമായി ബന്ധപ്പെട്ട മറ്റ് വിവരങ്ങൾ ഡി ആർ ഐ പുറത്തുവിട്ടിട്ടില്ല. 40 ലക്ഷം രൂപയുടെ മയക്കുമരുന്നുമായി രണ്ടാഴ്‌ച മുൻപ് കൊച്ചി വിമാനത്താവളത്തിൽ ഒരാൾ പിടിയിലായിരുന്നു. ഇയാളിൽ നിന്ന് 325 ഗ്രാം ആംഫെറ്റമിൻ എന്ന മയക്കുമരുന്ന് കണ്ടെത്തിയിരുന്നു.
മയക്കുമരുന്ന് 33 കാപ്‌സ്യൂളുകളാക്കി തുടയിൽ കെട്ടിവച്ച നിലയിലായിരുന്നു. അടുത്തിടെയാണ് കൊച്ചിയിൽ കടൽമാർഗം കടത്താൻ ശ്രമിച്ച 12000 കോടിയുടെ മയക്കുമരുന്ന് പിടികൂടിയത്. രാജ്യത്തെ ഏറ്റവും വലിയ മൂന്നാമത്തെ ലഹരിവേട്ടയാണിതെന്ന് അധികൃതർ സ്ഥിരീകരിച്ചിരുന്നു.
