ക്ഷേത്രനടയില്‍ എട്ട് വര്‍ഷമായി ഭിക്ഷാടനം; വൃദ്ധയുടെ അക്കൗണ്ടിലുള്ളത് രണ്ട് ലക്ഷം

എട്ട് വര്‍ഷമായി അമ്പലനടയില്‍ താമസമാക്കിയ ഭിക്ഷക്കാരിയുടെ അക്കൗണ്ടില്‍ 2 ലക്ഷം രൂപ നിക്ഷേപം. എഴുപതുകാരിയായ പാര്‍വ്വതത്തിന്റെ കൈവശം ആണ് ഇത്രയധികം രൂപ പുതുച്ചേരിയിലെ ക്ഷേത്ര അധികൃതര്‍ കണ്ടെത്തിയത്.

12,000 രൂപ കൈവശവും 2 ലക്ഷം രൂപയും ബാങ്ക് അക്കൗണ്ടിലുമുണ്ട്. മാത്രമല്ല, സ്വന്തമായി ക്രെഡിറ്റ് കാര്‍ഡും ആധാര്‍ കാര്‍ഡും ഉണ്ട്. അവശനിലയില്‍ ക്ഷേത്രത്തിനു പുറത്ത് ഭക്തരില്‍ നിന്നും ഭിക്ഷ യാചിക്കുമ്പോഴാണ് പാര്‍വ്വതത്തെ കണ്ടെത്തിയതെന്ന് പോലീസ് പറഞ്ഞു. തമിഴ്‌നാട്ടിലെ കല്ലികുറിച്ചി സ്വദേശിയായ പാര്‍വ്വതത്തെ ബന്ധുക്കള്‍ക്ക് കൈമാറിയതായും സഹോദരന്റെ സംരക്ഷണത്തിലാണ് അവര്‍ ഇപ്പോഴെന്നും എസ് പി മാരന്‍ വ്യക്തമാക്കി.

പാര്‍വ്വതത്തിന്റെ ഭര്‍ത്താവ് 40 വര്‍ഷം മുമ്പ് മരിച്ചു പോയി. അന്നുമുതല്‍ പുതുച്ചേരിയിലെ തെരുവോരങ്ങളില്‍ അലയുകയാണ് ഇവര്‍. എട്ടു വര്‍ഷത്തോളമായി ക്ഷേത്രനടയിലാണ് പാര്‍വ്വതം അന്തിയുറങ്ങുന്നതെന്നും ആളുകള്‍ നല്‍കുന്ന ഭക്ഷണം കഴിച്ചാണ് ഇവര്‍ ജീവന്‍ നിലനിര്‍ത്തുന്നതെന്നും ക്ഷേത്രത്തിനു അടുത്തുള്ള കടയുടമ പറഞ്ഞു.