സഹകരണ ബാങ്കുകളില്‍ ക്രമക്കേട്: ബിജെപിയുടെ ആരോപണം മന്ത്രി ശരിവെച്ചു: കെ.സുരേന്ദ്രന്‍

തിരുവനന്തപുരം: കേരളത്തിലെ 49 സഹകരണബാങ്കുകളില്‍ ക്രമക്കേട് നടന്നെന്ന സഹകരണമന്ത്രി വിഎന്‍ വാസവന്റെ പ്രസ്താവന ബിജെപിയുടെ ആരോപണങ്ങള്‍ ശരിവെക്കുന്നതാണെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍. സിപിഎം നിയന്ത്രണത്തിലുള്ള സഹകരണബാങ്കുകളില്‍ എല്ലാം വലിയ തട്ടിപ്പാണ് നടക്കുന്നത്. വലിയതോതിലുള്ള കള്ളപ്പണ ഇടപാടുകളുടെ കേന്ദ്രമാക്കി സഹകരണ ബാങ്കുകളെ സിപിഎം മാറ്റുകയാണ് എന്നും കെ.സുരേന്ദ്രന്‍ പറഞ്ഞു.

പേരാവൂര്‍ ബാങ്കില്‍ മാത്രമല്ല കണ്ണൂര്‍ ജില്ലയിലെയും സംസ്ഥാനത്തിന്റെ വിവിധ ഭാഗങ്ങളിലുമായി 150 ഓളം ബാങ്കുകളില്‍ നിക്ഷേപകര്‍ വഞ്ചിക്കപ്പെട്ടിട്ടുണ്ട്. ഇത് ബിജെപി നേരത്തെ തന്നെ ചൂണ്ടിക്കാട്ടിയിരുന്നു. എന്നാല്‍ കേന്ദ്രസര്‍ക്കാര്‍ സഹകരണമേഖലയില്‍ കൈകടത്താന്‍ ശ്രമിക്കുകയാണെന്നും സംസ്ഥാനത്തെ സഹകരണബാങ്കുകലെല്ലാം സുതാര്യമാണെന്നുമായിരുന്നു സര്‍ക്കാരിന്റെ മറുപടി എന്നും സുരേന്ദ്രന്‍ പറഞ്ഞു.

Loading...

കരിവന്നൂര്‍ ബാങ്കിലെ തട്ടിപ്പിനെ കുറിച്ച്‌ 2019 ല്‍ അന്നത്തെ സഹകരണ മന്ത്രി കടകംപ്പള്ളി സുരേന്ദ്രന് പരാതി ലഭിച്ചിരുന്നെന്ന വാസവന്‍ രേഖാമൂലം നിയമസഭയെ അറിയിച്ചത് ഞെട്ടിക്കുന്നതാണ്. തട്ടിപ്പിന് പിന്നില്‍ സിപിഎം നേതാക്കളായതു കൊണ്ടാണ് അന്നത്തെ മന്ത്രി ആ പരാതി മൂടിവെച്ചത്. 69 പേരുടെ പേരില്‍ നടപടിയെടുത്തെന്നാണ് മന്ത്രി പറയുന്നത്. ഇവരില്‍ എത്രപേര്‍ സിപിഎം നേതാക്കളാണെന്ന് വാസവന്‍ വ്യക്തമാക്കണമെന്നും സുരേന്ദ്രന്‍ ആവശ്യപ്പെട്ടു.