ഇരയും പ്രതിയും വിവാഹിതരായി… മറ്റ് വഴിയില്ലാതെ ബലാത്സംഗ കേസ് റദ്ദ് ചെയ്ത് കോടതി

മുംബൈ: ഇരയും പ്രതിയും വിവാഹിതരായതിനെ തുടര്‍ന്ന് ബലാത്സംഗ കേസ് ബോംബൈ ഹൈക്കോടതി റദ്ദാക്കി. പരസ്പര സമ്മതത്തോടെയായിരുന്നു തങ്ങളുടെ ബന്ധമെന്ന് പറഞ്ഞ് ഇര കഴിഞ്ഞ മാസം കോടതിയെ സമീപിക്കുയായിരുന്നു.

ഞങ്ങള്‍ സന്തോഷത്തോടെയാണ് ജീവിക്കുന്നതെന്ന് ഇവര്‍ കോടതിയെ അറിയിച്ചതിനെ തുടര്‍ന്നാണ് ജസ്റ്റിസുമാരായ രഞ്ജിത്ത് മോറെ ഭാരതി ദാംഗ്രെ എന്നിവരടങ്ങിയ ബഞ്ച് എഫ്.ഐ.ആര്‍ റദ്ദാക്കിയത്.

കഴിഞ്ഞ മാസമാണ് ഇര പ്രതിക്കെതിരെ ബലാത്സംഗവും വഞ്ചനയും ആരോപിച്ച് മുംബൈ പോലീസ് സ്‌റ്റേഷനില്‍ പരാതി നല്‍കിയത്. വിവാഹ വാഗ്ദാനത്തില്‍ നിന്ന് പ്രതി പിന്‍വാങ്ങിയതോടെയാണ് പരാതി നല്‍കിയതെന്നും കുടുംബക്കാരുടേയും സുഹൃത്തുക്കളുടേയും ഇടപെടലിനെ തുടര്‍ന്ന് പ്രശ്‌നം പരിഹരിച്ചെന്നും ദമ്പതികള്‍ കോടതിയെ ആറിയിച്ചു.

ഇരയും പ്രതിയും രമ്യതയിലായതുകൊണ്ടു മാത്രം ബലാത്സംഗ കേസ് റദ്ദാക്കരുതെന്ന് സുപ്രീം കോടതി നേരത്തെ നിര്‍ദേശിച്ചിരുന്നു. ഇതിനായി കോടതി മാര്‍ഗവും പുറപ്പെടുവിച്ചിരുന്നു.

ബലാത്സംഗം സമൂഹത്തിനെതിരായ കുറ്റ കൃത്യമാണെന്നും ഇത്തരം കേസുകളില്‍ കരുതലോടെയായിരിക്കണം കോടതി വിവേചനാധികാരം ഉപയോഗിക്കേണ്ടതെന്നും സുപ്രീം കോടതി നിര്‍ദേശിച്ചിരുന്നു.