അനുമതിയില്ലാതെ അഭിമുഖം നല്‍കിയ പൊലീസുകാരന് സസ്‌പെന്‍ഷന്‍; ഐശ്വര്യ ഡോങ്‌റെയുടെ വിവാദ നടപടി വീണ്ടും

കൊച്ചി: കൊച്ചി ഡിസിപി ഐശ്വര്യ ഡോങ്‌റെയുടെ വിവാദ നടപടിയാണ് വീണ്ടും ചര്‍ച്ചയാകുന്നത്. സിവില്‍ പൊലീസ് ഓഫീസര്‍ സിപി രഘുവിനെ സസ്‌പെന്‍ഡ് ചെയ്തതാണ് വീണ്ടും ഐശ്വര്യ വാര്‍ത്തകളില്‍ ഇടം നേടാന്‍ കാരണമായിരിക്കുന്നത്. കളമശ്ശേരി പൊലീസ് സ്റ്റേഷനില്‍ കോഫീ മെഷീന്‍ സ്ഥാപിക്കാന്‍ മുന്‍കൈയെടുത്ത ഉദ്യോഗസ്ഥനായിരുന്നു സിപി രഘു. എന്നാല്‍ മേലുദ്യോഗസ്ഥരെ അറിയിക്കാതെ കോഫീ മെഷീന്റെ ഉദ്ഘാടനം നടത്തിയതിനും മാധ്യമങ്ങള്‍ക്ക് അഭിമുഖം നല്‍കിയതിനുമാണ് രഘുവിനെതിരെ നടപടിയെടുത്തിരിക്കുന്നത്. പണപ്പിരിവ് ഉള്‍പ്പെടെയുള്ള ആരോപണങ്ങളാണ് പൊലീസുകാരനെതിരെ ഉയര്‍ന്നിരിക്കുന്നത്. ഈ സാഹചര്യത്തില്‍ വിശദമായ അന്വേഷണം നടത്തുന്നതിനായി നാര്‍ക്കോട്ടിക്ക് സെല്‍ അസിസ്റ്റന്റ് കമ്മീഷണറെയും ചുമതലപ്പെടുത്തിയിരിക്കുകയാണ്.

അതേസമയം, ഉദ്ഘാടന ചടങ്ങില്‍ ഡിസിപിയെ ക്ഷണിക്കാതിരുന്നതിന്റെ ദേഷ്യം തീര്‍ക്കലാണ് നടപടിക്കു പിന്നിലെന്നാണ് ഇപ്പോള്‍ പൊലീസുകാര്‍ക്കിടയിലെ സംസാരം.സംസ്ഥാനത്ത് ആദ്യമായി ഒരു പൊലീസ് സ്റ്റേഷന്‍ കൂടുതല്‍ ജനസൗഹൃദമാക്കാന്‍ സ്റ്റേഷനില്‍ എത്തുന്നവര്‍ക്ക് ചായയും ബിസ്‌കറ്റും തണുത്ത വെള്ളവും നല്‍കുന്ന പദ്ധതി നടപ്പാക്കിയതിന് അഭിനന്ദനങ്ങള്‍ ലഭിക്കുന്നതിനിടെയാണ് പദ്ധതിക്ക് ചുക്കാന്‍ പിടിച്ച ഉദ്യോഗസ്ഥനെ തേടി സസ്‌പെന്‍ഷന്‍ എത്തിയിരിക്കുന്നത്. നേരത്തേ കൊവിഡ് ഭീതി രൂക്ഷമായിരിക്കെ തെരുവില്‍ ഭക്ഷണമില്ലാതെ കഴിയുന്നവര്‍ക്കും തെരുവുനായകള്‍ക്കും ഭക്ഷണം നല്‍കി കളമശേരി പൊലീസ് സ്റ്റേഷന്‍ മാതൃകയായിരുന്നു.

Loading...

മഫ്തിയിലെത്തിയ പുതിയ ഡിസിപിയെ തിരിച്ചറിയാതെ പൊലീസ് സ്റ്റേഷന് മുന്നില്‍ തടഞ്ഞ വനിതാ പൊലീസ് ഉദ്യോഗസ്ഥയ്‌ക്കെതിരെ ശിക്ഷാ നടപടി സ്വീകരിച്ച കൊച്ചി ഡിസിപിയുടെ നടപടി നേരത്തെ തന്നെ വിവാദമായിരുന്നു. എറണാകുളം നോര്‍ത്ത് പൊലീസ് സ്റ്റേഷനിലെ വനിതാ പെലീസുകാരിക്കെതിരെയായിരുന്നു നടപടി സ്വീകരിച്ചത്. പുതുതായി ചുമതലയേറ്റ ശേഷം മഫ്തിയിലെത്തിയ ഡിസിപിയെ പൊലീസുകാരി തടഞ്ഞ് വിവരങ്ങള്‍ അന്വേഷിച്ചതായിരുന്നു പ്രകോപനം. കൊവിഡ് നിയന്ത്രണങ്ങളുള്ളതിനാല്‍ സാധാരണ നടത്തുന്ന പരിശോധനയായിരുന്നെന്നും മഫ്തിയിലെത്തിയതിനാല്‍ തിരിച്ചറിഞ്ഞില്ലെന്ന് വിശദീകരണം നല്‍കിയിട്ടും പൊലീസുകാരിയെ പാറാവ് ജോലിയില്‍ നിന്ന് ട്രാഫിക്കിലേക്ക് മാറ്റി. ഡിസിപിയുടെ ഈ നടപടിയും വലിയ വിവാദത്തിന് ഇടയാക്കിയിരുന്നു.