ശാന്തിഗിരി: നാമരൂപങ്ങള്‍ക്കും കാലദേശങ്ങള്‍ക്കും അതീതനായ ദൈവം ഗുരുരൂപത്തില്‍ മാനവരാശിയെ ധര്‍മ്മത്തിന്റെയും നവസംസ്കാരത്തിന്റെയും പാതയിലേക്ക് നയിക്കുന്നുവെന്ന് ‘ഗുരുമാര്‍ഗം–സാംസ്കാരിക ക്രിയാത്മകതയും സാമൂഹിക പരിവര്‍ത്തനവും’ എന്ന വിഷയത്തില്‍ ശാന്തിഗിരി ആശ്രമത്തില്‍ സംഘടിപ്പിച്ച ദേശീയ സെമിനാര്‍ വിലയിരുത്തി. ക്ഷേത്ര സമ്പ്രദായത്തില്‍ നിന്നും വ്യത്യസ്തമായി ജ്ഞാന സമ്പ്രദായത്തിലെ ഗുരുവര്യന്മാര്‍ ധര്‍മ്മത്തെ കാലത്തിനൊത്ത് നിര്‍വചിക്കുകയും ശക്തിപ്പെടുത്തുകയും ചെയ്തു. മതങ്ങള്‍ സമൂഹത്തിന്റെ ആത്മീയവും സാമൂഹ്യവുമായ പരിവര്‍ത്തനത്തിന്റെ പാതയില്‍ വിലങ്ങുതടിയായി നില്ക്കുന്ന സന്ദര്‍ഭങ്ങളില്‍ പരിവര്‍ത്തന സംഹിതയെ പ്രതിനിധീകരിക്കുന്ന മഹാത്മാക്കളും അവരെ പിന്‍പറ്റി വന്ന ഗുരുപരമ്പരകളും മാനവരാശിയുടെ ധര്‍മ്മത്തെ പുനര്‍വ്യാഖ്യാനം ചെയ്തുകൊണ്ട് സമൂഹത്തെ മുന്നോട്ടു നയിച്ചു എന്നും സെമിനാര്‍ ചൂണ്ടിക്കാട്ടി.
ശാന്തിഗിരി റിസര്‍ച്ച് ഫൌണ്ടേഷനും കേരള സര്‍വ്വകലാശാല, കാലടി സംസ്കൃത സര്‍വ്വകലാശാല എന്നിവയുടെ ഫിലോസഫി ഡിപ്പാര്‍ട്ടുമെന്റുകളും സംയുക്തമായി സംഘടിപ്പിച്ചിരിക്കുന്ന സെമിനാര്‍ ശാന്തിഗിരി ആശ്രമം ഓര്‍ഗനൈസിംഗ് സെക്രട്ടറി സ്വാമി ഗുരുരത്നം ജ്ഞാനതപസ്വി ഉദ്ഘാടനം ചെയ്തു. ഐ.സി.പി.ആര്‍. ചെയര്‍മാന്‍ പത്മഭൂഷണ്‍ പ്രൊഫസര്‍ മൃണാള്‍ മിറി എം.പി അദ്ധ്യക്ഷത വഹിച്ചു. മുന്‍ കേന്ദ്രമന്ത്രി ഒ. രാജഗോപാല്‍, ശാന്തിഗിരി ആശ്രമം ഡയറക്ടര്‍ (ടെക്നിക്കല്‍) സ്വാമി നവനന്മ ജ്ഞാനതപസ്വി, ഡോ. ബാബു ജേക്കബ് ഐ.എ.എസ്. (റിട്ട.), പ്രൊഫസര്‍ വി.എന്‍. ഝാ (പൂനെ യൂണിവേഴ്സിറ്റി), ചെന്നൈ രാമാനുജന്‍ മിഷന്‍ ട്രസ്റ്റ് ചെയര്‍മാന്‍ പ്രൊഫസര്‍ പ്രസന്ന ചതുര്‍വേദി സ്വാമി, ഇന്ത്യന്‍ കൌണ്‍സില്‍ ഓഫ് ഗാന്ധിയന്‍ സ്റ്റഡീസ് ചെയര്‍മാന്‍ ഡോ. എന്‍. രാധാകൃഷ്ണന്‍, പ്രൊഫസര്‍ സുജാതാ മിറി, പ്രൊഫസര്‍ സെബാസ്റ്റ്യന്‍ വാളാശേരി, ശാന്തിഗിരി റിസര്‍ച്ച് ഫൌണ്ടേഷന്‍ ചീഫ് ഫെലോ ഡോ. കെ. രാജശേഖരന്‍ പിള്ള, ഫെലോ ഡോ. കെ. ഗോപിനാഥന്‍ പിള്ള, ഡോ. സി.വി. ബാബു തുടങ്ങിയവര്‍ സംസാരിച്ചു.
ഗുരുസമ്പ്രദായങ്ങളുടെ താത്വികവും ചരിത്രപരവുമായ വശങ്ങളും കേരളത്തിന്റെ ചരിത്രത്തിലും സമൂഹത്തിലും വിവിധ ഗുരുസമ്പ്രദായങ്ങള്‍ സൃഷ്ടിച്ച സാംസ്കാരികവും സാമൂഹികവുമായ പരിവര്‍ത്തനവും ആണ് രണ്ടു ദിവസമായി നടക്കുന്ന സെമിനാറില്‍ ചര്‍ച്ച ചെയ്യപ്പെടുന്നത്. ഇന്ന് നടക്കുന്ന സമാപന സമ്മേളനത്തില്‍ ശിവഗിരി മഠം ജനറല്‍ സെക്രട്ടറി സ്വാമി ഋതംഭരാനന്ദ, മുന്‍ ചീഫ് സെക്രട്ടറി ആര്‍. രാമചന്ദ്രന്‍ നായര്‍, ന്യൂഡെല്‍ഹി തീന്‍മൂര്‍ത്തി മെമ്മോറിയല്‍ മ്യൂസിയം മുന്‍ ക്യൂറേറ്റര്‍ പി. ചന്ദ്രമോഹന്‍, ഡോ. എം. എസ്. നായര്‍ (മലബാര്‍ ഇന്‍സ്റ്റിറ്റ്യൂട്ട് ഓഫ് റിസര്‍ച്ച് ആന്റ് ഡെവലപ്മെന്റ്), ബഹിരാകാശ ശാസ്ത്രജ്ഞനും വിദ്യാഭ്യാസ വിചക്ഷണനുമായ ഡോ. റ്റി.പി. ശശികുമാര്‍ തുടങ്ങിയവര്‍ സംസാരിക്കും.
പ്രൊഫസര്‍ പനീര്‍ ശെല്‍വം (മദ്രാസ് യൂണിവേഴ്സിറ്റി), പ്രൊഫസര്‍ ശ്രീകല എം. നായര്‍(കാലടി സംസ്കൃത സര്‍വകലാശാല), ഡോ. ബിനാ ഐസക് (കേരള യൂണിവേഴ്സിറ്റി), ഡോ. പി.ഐ. ദേവരാജന്‍, ഡോ. ലക്ഷ്മി ആര്‍., ഡോ.കെ.ആര്‍.എസ്. നായര്‍, ജി. ജനാര്‍ദ്ദന മേനോന്‍ (ശാന്തിഗിരി റിസര്‍ച്ച് ഫൌണ്ടേഷന്‍) തുടങ്ങിയവര്‍ പ്രബന്ധങ്ങള്‍ അവതരിപ്പിക്കും.
ഫോട്ടോ : ഗുരുമാര്‍ഗ്ഗത്തെ അധികരിച്ചുള്ള ദ്വിദിന ദേശീയ സെമിനാര്‍ ശാന്തിഗിരിയില്‍ ആശ്രമം ഓര്‍ഗനൈസിംഗ് സെക്രട്ടറി സ്വാമി ഗുരുരത്നം ജ്ഞാനതപസ്വി ഉദ്ഘാടനം ചെയ്യുന്നു. ഡോ. കെ. രാജശേഖരന്‍ പിള്ള, ഡോ. എന്‍. രാധാകൃഷ്ണന്‍, ഡോ. കെ. ഗോപിനാഥന്‍ പിള്ള ഡോ. ബാബു ജേക്കബ് ഐ.എ.എസ് (റിട്ട.), പത്മഭൂഷണ്‍ പ്രൊഫസര്‍ മൃണാള്‍ മിറി എം.പി, പ്രൊഫസര്‍ സുജാതാ മിറി, ഡോ. പി.ഐ. ദേവരാജന്‍ തുടങ്ങിയവര്‍ സമീപം.
