ആര്‍ക്ക് പിറന്ന വിധിയാണിത്, അയോധ്യ കേസ് വിധി, പ്രതികരണവുമായി അഡ്വ. ഹരീഷ് വാസുദേവന്‍

Loading...

തിരുവനന്തപുരം: അയോധ്യ കേസിലെ സുപ്രീം കോടതി വിധിയില്‍ പ്രതികരണവുമായി അഭിഭാഷകന്‍ ഹരീഷ് വാസുദേവന്‍. ഇതുപോലെ തന്ത (തള്ളയും) ഇല്ലാത്തൊരു വിധി സുപ്രീംകോടതിയുടെ ചരിത്രത്തിലുണ്ടോ. (പച്ച മലയാളമാണ്, അശ്ലീലമോ നിലവാരക്കുറവോ ആല്ല. ആര്‍ക്ക് പിറന്ന വിധിയാണിത്). ഹരീഷ് ഫേസ്ബുക്കില്‍ കുറിച്ചു.

അയോദ്ധ്യ ഭൂമി തര്‍ക്ക കേസില്‍ 2.77 ഏക്കര്‍ തര്‍ക്കസ്ഥലത്ത് ക്ഷേത്രം നിര്‍മിക്കാനുള്ള വിധിയാണ് സുപ്രീംകോടതി ഇന്ന് പുറപ്പെടുവിച്ചിട്ടുള്ളത്. മുസ്ലിം പള്ളി നിര്‍മിക്കാനായി പകരം അഞ്ച് ഏക്കര്‍ തര്‍ക്കഭൂമിക്കു പുറത്ത് അയോദ്ധ്യയില്‍ത്തന്നെ അനുവദിക്കാനും കോടതി ഉത്തരവിട്ടു. കേസില്‍ 1045 പേജുള്ള വിധിന്യായമാണ് സുപ്രീംകോടതി പുറപ്പെടുവിച്ചിരിക്കുന്നത്. എന്നാല്‍ അതില്‍ ഐക്യകണ്‌ഠേന എടുത്ത വിധി എഴുതിയ ജഡ്ജി ആരാണെന്നതിനെക്കുറിച്ച് ഇപ്പോഴും സൂചനയില്ല. കീഴ്‌വഴക്കപ്രകാരം വിധിന്യായം എഴുതിയതാരെന്നതിനെക്കുറിച്ചു വ്യക്തമായി കോടതി തന്നെ പറയേണ്ടതാണ്. ഏത് ബെഞ്ചാണോ വിധി പുറപ്പെടുവിച്ചത്, ആ ബെഞ്ചിനെ പ്രതിനിധീകരിച്ച് ഒരു ജഡ്ജി വിധിന്യായം തയ്യാറാക്കാറുകയാണു പതിവ്. എന്നാല്‍ ആ ജഡ്ജിയെ കുറിച്ച് പറയാന്‍ കോടതി തയ്യാറായിട്ടില്ല.

Loading...

അതേസമയം വിധി രാജ്യത്തിന്റെ ഐക്യവും അഖണ്ഡതയും സംസ്‌കാരവും കൂടുതല്‍ ശക്തിപ്പെടുത്തുമെന്ന് ബി.ജെ.പി അധ്യക്ഷനും കേന്ദ്ര ആഭ്യന്തരമന്ത്രിയുമായ അമിത് ഷാ ചൂണ്ടിക്കാട്ടി.

സുപ്രീം കോടതിയില്‍ നിന്നുള്ള ഈ നിര്‍ണായക വിധി അതിനാല്‍ തന്നെ ഒരു നാഴികകല്ലാണ്. ഈ തീരുമാനം രാജ്യത്തിന്റെ ഐക്യവും അഖണ്ഡതയും മഹത്തായ സംസ്‌കാരവും ശക്തിപ്പെടുത്തുമെന്നും അമിത് ഷാ പ്രതികരിച്ചു.

തര്‍ക്കവിഷയം പരിഹരിക്കാന്‍ ഇടപെട്ട എല്ലാവരോടും നന്ദി പറയുന്നു. വിധി എല്ലാവരും അംഗീകരിക്കുകയും സമാധാനം തുടരുകയും ‘ഏക് ഭാരത് ശ്രേഷ്ഠ ഭാരത്’ എന്നത് തുടരുക തന്നെ വേണം. വര്‍ഷങ്ങളായി തുടര്‍ന്നിരുന്ന തര്‍ക്കത്തില്‍ ഇന്ന് അന്തിമ തീരുമാനം വന്നിരിക്കുന്നു. രാജ്യത്തിന്റെ നീതിന്യായ വ്യവസ്ഥയേയും എല്ലാ ന്യായാധിപന്മാരേയും താന്‍ അഭിനന്ദിക്കുന്നു. അമിത് ഷാ കൂട്ടിച്ചേര്‍ത്തു.

വിധിയെ സ്വാഗതം ചെയ്യുവെന്ന് കോണ്‍ഗ്രസ് വക്താവ് രണ്‍ദീപ് സുര്‍ജേവാലയും വ്യക്തമാക്കി. വിധി സ്വാഗതാര്‍ഹവും അയോധ്യയിലെ തര്‍ക്കഭൂമിയില്‍ രാമക്ഷേത്രം നിര്‍മ്മിക്കുന്നതില്‍ കോണ്‍ഗ്രസ് അനുകൂലിക്കുന്നതായും വക്താവ് സുര്‍ജേവാല പറഞ്ഞു. വിധിയെ കോണ്‍ഗ്രസ് മാനിക്കുന്നു. മതേതര മൂല്യങ്ങള്‍ കണക്കിലെടുത്ത് വിധി എല്ലാവരും അംഗീകരിക്കണമെന്നും സമാധാനവും സൗഹാര്‍ദ്ദവും നിലനിര്‍ത്തണമെന്നും കോണ്‍ഗ്രസ് പത്രക്കുറിപ്പിലൂടെ ആഹ്വാനം ചെയ്തു.

ശ്രീരാമന്റെ ജന്മസ്ഥലമെന്നു വിശ്വസിക്കപ്പെടുന്ന 2.77 ഏക്കര്‍ ഭൂമിയാണു തര്‍ക്കത്തിന്റെ കേന്ദ്രബിന്ദു. ഇതു ക്ഷേത്രകാര്യങ്ങള്‍ നടത്താന്‍ അവകാശമുള്ള നിര്‍മോഹി അഖാര, ശ്രീരാമപ്രതിഷ്ഠയെ പ്രതിനിധീകരിക്കുന്ന രാംലല്ലാ വിരാജ്മാന്‍, ബാബ്‌റി മസ്ജിറിന്റെ ചുമതലക്കാരായിരുന്ന ഉത്തര്‍പ്രദേശ് സുന്നി സെന്‍ട്രല്‍ വഖഫ് ബോര്‍ഡ് എന്നിവര്‍ക്കു തുല്യമായി പങ്കിടാന്‍ 2010 ല്‍ അലഹബാദ് ഹൈക്കോടതി പുറപ്പെടുവിച്ച വിധിയെ എതിര്‍ത്തുകൊണ്ടുള്ള ഹര്‍ജിയിലാണ് അന്തിമ തീരുമാനം വന്നത്.

ഇക്കാര്യത്തില്‍ 14 ഹര്‍ജികളാണു സുപ്രീം കോടതിക്ക് മുന്നിലെത്തിയത്. 40 ദിവസത്തോളം നീണ്ട മാരത്തോണ്‍ വിചാരണയ്ക്ക് ശേഷമാണ് വിധി പുറപ്പെടുവിച്ചത്. സുപ്രീംകോടതി വിധിയുടെ മുന്നോടിയായി രാജ്യത്തുടനീളവും ഉത്തര്‍പ്രദേശിലും കനത്ത സുരക്ഷയാണ് ഏര്‍പ്പെടുത്തിയിരിക്കുന്നത്.

ഇന്നലെ വൈകിട്ടോടെ തന്നെ സുപ്രീം കോടതി പരിസരത്തും സുരക്ഷാക്രമീകരണങ്ങള്‍ വിപുലമാക്കിയിരുന്നു. വിധി എന്തു തന്നെയായാലും അത് ആരുടേയും വിജയമോ പരാജയമോ അല്ലെന്നും വിധി എന്തായാലും സംയമനത്തോടെയാകണം നേരിടേണ്ടതെന്നും പ്രധാനമന്ത്രി രാജ്യത്തോട് ആഹ്വാനം ചെയ്തിരുന്നു.