തിരുവനന്തപുരം : സൗദി അറേബ്യയിലേക്കുള്ള യാത്രാമധ്യേ ദുബായില്‍ കുടുങ്ങിയ മലയാളികള്‍ക്ക് യാത്രാനുവാദം നല്‍കണമെന്ന് സംസ്ഥാനം ആവശ്യപ്പെട്ടു. മുഖ്യമന്ത്രിയുടെ നിര്‍ദ്ദേശപ്രകാരം നോര്‍ക്ക പ്രിന്‍സിപ്പല്‍ സെക്രട്ടറി ഡോ. കെ. ഇളങ്കോവന്‍, യു.എ.ഇ.യിലെ ഇന്ത്യന്‍ അംബാസിഡര്‍ക്ക് അയച്ച കത്തിലാണ് ആവശ്യം ഉന്നയിച്ചത്.
ഇന്ത്യയില്‍ നിന്ന് സൗദി അറേബ്യയിലേക്ക് നേരിട്ട് വിമാന സര്‍വീസ് ഇല്ലാത്തതിനാല്‍ ദുബായ് വഴി സൗദിയിലേക്ക് യാത്ര പുറപ്പെട്ടവരാണ് കോവിഡ് കാരണം കുടുങ്ങിപ്പോയത്. ദുബായില്‍ 14 ദിവസത്തെ ക്വാറന്റയിനില്‍ കഴിഞ്ഞ ഇവര്‍ സൗദി അറേബ്യ ഏര്‍പ്പെടുത്തിയ വിമാനയാത്രാ വിലക്ക് കാരണം പെട്ടുപോകുകയായിരുന്നു.
ഇവര്‍ക്ക് താമസം, ഭക്ഷണം ഉള്‍പ്പെടെയുള്ള അടിസ്ഥാന സൗകര്യം ഏര്‍പ്പെടുത്തുക, സന്ദര്‍ശന വിസാ കാലാവധി കഴിഞ്ഞവര്‍ക്ക് നീട്ടി നല്‍കുക, യാത്രാനുവാദം സംബന്ധിച്ച അനിശ്ചിതത്വം തുടരുന്ന പക്ഷം കേരളത്തിലേക്ക് മടങ്ങാനുള്ള സൗകര്യം സജ്ജമാക്കുക എന്നീ ആവശ്യങ്ങളാണ് സംസ്ഥാനം ഉന്നയിച്ചത്.
