“വൈറസുകളും ബാക്ടീരിയകളും ഇരതേടിയിറങ്ങുന്നത് രാത്രി ഒൻപതു മണിക്കാണ്, ഒൻപത് മിനിറ്റ് സമയമാണ് അവയുടെ ഇരതേടൽ സമയം”,പരിഹാസവുമായി ജോമോൾ

ഞായറാഴ്ച രാത്രി ഒമ്പത് മണിക്ക് ലൈറ്റുകൾ ഓഫ് ആക്കി തിരി തെളിക്കും എന്ന് പ്രധാനമന്ത്രി നരേന്ദ്ര മോഡി പറഞ്ഞതിനെ ട്രോളി മോഡൽ ജോമോൾ ജോസഫ്. വൈദ്യുത വിളക്കുകൾ ഓഫ് ചെയ്ത്, തീ ഉപയോഗിച്ചുള്ള പ്രകാശം സൃഷ്ടിച്ചാൽ, കൊറോണയടക്കമുള്ള സൂക്ഷ്മ ജീവികൾ വെളിച്ചം തേടിവരും. അങ്ങനെ തീയുടെ സമീപത്തിലേക്ക് വരുന്ന പ്രാണികളും വൈറസുകളും ബാക്ടീരിയകളും തീയിൽ പെട്ട് ചത്തൊടുങ്ങും. കൊറോണയല്ല കൊറോണയുടെ വല്യുപ്പാപ്പ വരെ ആ തീയിൽ പെട്ട് ചാകും. കോവിഡ് മാത്രമല്ല, ക്യാൻസർ പോലുള്ള സകല മാരക രോഗങ്ങളും കുറഞ്ഞു വരും.- ജോമോൾ കുറിച്ചു.

ജോമോളൂടെ ഫേസ്ബുക്ക് പോസ്റ്റിന്റെ പൂർണ രൂപം:

Loading...

ലൈറ്റുകളോഫാക്കി വിളക്കോ മെഴുകുതിരിയോ കത്തിക്കുന്നതിന് പിന്നിലുമുണ്ട് സയൻസ്..

രാത്രികളിൽ നമ്മൾ വീടുകളിൽ ലൈറ്റുകളിടുമ്പോൾ വീടിന് പുറത്തുനിന്നും പ്രാണികളൊക്കെ പറന്ന് വീടിനകത്തുള്ള ലൈറ്റിന് ചുറ്റും വന്നിരിക്കുന്നത് കണ്ടിട്ടില്ലേ? ചിലപ്പോഴൊക്കെ പ്രാണിശല്യം കാരണം വീടിനകത്തെ ലൈറ്റുകൾ ഓഫ് ചെയ്ത്, വീടിന് പുറത്തെ ലൈറ്റുകളിട്ട് വാതിലുകളും ജനലുകളും തുറന്നിട്ട്, കുറച്ചു സമയം കഴിയുമ്പോൾ പ്രാണികൾ വീടിന് പുറത്തുള്ള ലൈറ്റുകൾക്ക് ചുറ്റും തമ്പടിക്കുന്നത് കാണാം. പ്രാണികൾ വീടിന് വെളിയിലെത്തിയാൽ ജനലുകളും വാതിലുകളും അടച്ചിട്ട് നമ്മൾ വീണ്ടും വീട്ടിനകത്തെ ലൈറ്റോഫാക്കും.

എന്നാൽ പണ്ടു കാലത്ത് വിളക്കുകൾ കത്തിച്ചു വെച്ചാണ് നമ്മൾ രാത്രിയിൽ പ്രകാശം കണ്ടെത്തിയിരുന്നത്. അക്കാലത്ത് വെളിച്ചം കണ്ട് വീടിനകത്തേക്ക് പറന്നുവരുന്ന പ്രാണികൾ, വിളക്കിലെ തീയിൽ പെട്ട് ചത്തുപോകുമായിരുന്നു. കൂടാതെ പറമ്പിലും വീടിന് വെളിയിലും ചപ്പുചവറുകൾ കൂട്ടിയിട്ട് രാത്രിയിൽ തീകത്തിക്കുകയും ചെയ്തിരുന്നു. ഇത് പ്രാണിനശീകരണത്തിന് വലിയൊരു പരിഹാരമായിരുന്നു. പ്രകൃതി ദത്ത മാർഗ്ഗം.

ഇങ്ങനെ വിളക്കുതെളിക്കലും തീകത്തിക്കലും പോലുള്ള കാര്യങ്ങൾ ചെയ്യുമ്പോൾ, കേവലം പ്രാണികൾ മാത്രമല്ല, നിരവധി ബാക്ടീരിയകളും വൈറസുകളും മനുഷ്യന് ദോഷകരമായ പല സൂക്ഷ്മജീവികളും ഇല്ലാതാകുമായിരുന്നു. അതിനാൽ തന്നെ രോഗങ്ങളും കുറവായിരുന്നു. രോഗവ്യാപനവും വലിയതോതിലില്ലായിരുന്നു. കാലം മാറി, കറന്റ് വന്നു, വിളക്കുകൾക്ക് പകരം വൈദ്യുതി വിളക്കുകളായി. പാടവും കൃഷികളും കുറഞ്ഞു, പാടങ്ങളും കൃഷിയിടങ്ങളും ഹൌസിങ് പ്ലോട്ടുകളായി, വീടുകൾ നിറഞ്ഞു, കൃഷിചെയ്യാതെ പാടങ്ങളും കൃഷിയിടങ്ങളും വെറുതേ കിടക്കുന്നു. കൃഷി ചെയ്യുന്നവർ തന്നെ പാരമ്പര്യ രീതികൾ വിട്ട് നൂതന രീതികളിലേക്ക് വന്നു. ദോഷകരമായ സൂക്ഷ്മ ജീവികൾ പെരുകി, ഉള്ള കൃഷിയിൽ വിളവ് കുറഞ്ഞു, പെരുകിയ സൂക്ഷ്മ ജീവികളിൽ പലതും മനുഷ്യന് തന്നെ ആപത്തായി മാറി, അവ മഹാമാരിയായി മനുഷ്യന് നിയന്ത്രിക്കാനാകാത്ത നിലയിലെത്തി.

ഇവിടെയാണ് പ്രധാനമന്ത്രിയുടെ വാക്കുകളുടെ പ്രസക്തി..

വൈദ്യുത വിളക്കുകൾ ഓഫ് ചെയ്ത്, തീ ഉപയോഗിച്ചുള്ള പ്രകാശം സൃഷ്ടിച്ചാൽ, കൊറോണയടക്കമുള്ള സൂക്ഷ്മ ജീവികൾ വെളിച്ചം തേടിവരും. അങ്ങനെ തീയുടെ സമീപത്തിലേക്ക് വരുന്ന പ്രാണികളും വൈറസുകളും ബാക്ടീരിയകളും തീയിൽ പെട്ട് ചത്തൊടുങ്ങും. കൊറോണയല്ല കൊറോണയുടെ വല്യുപ്പാപ്പ വരെ ആ തീയിൽ പെട്ട് ചാകും. കോവിഡ് മാത്രമല്ല, ക്യാൻസർ പോലുള്ള സകല മാരക രോഗങ്ങളും കുറഞ്ഞു വരും.

എന്തിന് രാത്രി ഒൻപതുമണി?

അമീബ ഇര പിടിക്കാനിറങ്ങുന്നത് പാതിരാത്രി പതിനൊന്നര മണിക്കാണ്. കൃത്യം പന്ത്രണ്ട് മണിക്ക് അമീബ ഇരയെ പിടികൂടി ഭക്ഷിച്ച് പന്ത്രണ്ടരയോടെ അമീബ അതിന്റെ മാളത്തിലേക്ക് തിരിച്ചുകേറും. ഇങ്ങനെ ഓരോ ജീവിക്കും ഒരു സമയക്രമവും ഭക്ഷണക്രമവും ജീവിത രീതിയും ഉണ്ട്. ഈ ലോകത്തിലെ സകല ചരാചരങ്ങൾക്കും സമയക്രമം ബാധകമാണ്.

വെറസുകളും ബാക്ടീരിയകളും ഇരതേടിയിറങ്ങുന്നത് രാത്രി ഒൻപതുമണിക്കാണ്. ഒൻപത് മിനിറ്റ് സമയമാണ് അവയുടെ ഇരതേടൽ സമയം. അതുകൊണ്ട് കൃത്യം ഒൻപതുമണിക്ക് തീയിട്ട് ആ വെളിച്ചത്തിലേക്ക് വൈറസുകളെ ആകർഷിക്കണം. നാലുമിനിറ്റ് അതിനായി വേണ്ടിവരും, അവക്ക് തീയുടെ പ്രകാശവലയത്തിന് ചുറ്റിലും കറങ്ങി തിരിയാനായി രണ്ട് മിനിറ്റ്, ബാക്കി മൂന്നുമിനിറ്റ് കൊണ്ട് സകല വൈറസുകളുടേയും ഹോമകുണ്ഡമായി ആ തീ മാറും. ഹോമങ്ങളും യാഗങ്ങളും ഇങ്ങനെ പ്രകൃതിയെ ബാലൻസ് ചെയ്യുന്നതിൽ വലിയ പങ്കുവഹിച്ചിട്ടുണ്ട്. ഒൻപതു മിനിറ്റ് കഴിഞ്ഞാൽ അതായത് രാത്രി ഒൻപതേ പത്തോട് കൂടി മനുഷ്യന് ദോഷകരമായ വൈറസുകളും ബാക്ടീരിയകളും ഇരതേടുന്ന സമയം കഴിയും, അവ അവയുടെ മാളത്തിലേക്ക് തിരികെ പോകും. ഒൻപതേ പത്തമുതൽ മനുഷ്യന് ഉപകാരികളായ സൂക്ഷ്മ ജീവികളുടെ ഇരതേടൽ സമയമാണ്. അതുകൊണ്ട് യാതൊരു കാരണവശാലും രാത്രി ഒൻപതേ പത്തിന് ശേഷം തീ കത്തിച്ച് പ്രകാശമിടാതെ വൈദ്യുത വിളക്കുകൾ തന്നെ തെളിയിക്കേണ്ടതുണ്ട്.

എന്തുകൊണ്ട് ഞായറാഴ്ച?

എല്ലാ മാസവും ആദ്യ ഞായറാഴ്ച മനുഷ്യന് ദോഷകരമായ സൂക്ഷ്മ ജീവികളുടെ സംക്രാന്ത്രി ദിവസമാണ്. അന്നേ ദിവസം സകല കൊറോണ വൈറസുകളും വീട്ടിലുള്ള കൊച്ചുപിച്ച പ്രായമായവരുൾപ്പെടെ വന്ദ്യ വയോധികരുൾപ്പെടെ ഇരതേടാനായി ആഘോഷപൂർവ്വം പുറത്തിറങ്ങും. സാധാരണ കൊറോണ കുടുംബത്തിലെ അച്ഛൻ കൊറോണയാണ് ഇരതേടി വീട്ടിലെത്തിച്ച് കുടുംബാംഗങ്ങളായ ഭാര്യ കൊറോണയേയും മക്കൾ കൊറോണയേയും കടുംബത്തിലെ പ്രായമായ സകല കൊറോണകളേയും തീറ്റിപ്പോറ്റുന്നത്. സംക്രാന്തി ദിവസം കുടുംബസമേതം ഉൽസവ പ്രതീതിയിൽ കൊറോണകൾ കൂട്ടമായി പുറത്തിറങ്ങുമ്പോൾ വേണം നമ്മൾ അവയെ കൊന്നുതള്ളാനുള്ള ഹോമകുണ്ഡമൊരുക്കാനായി.

ഇത് ആർഷഭാരതത്തിന് മാത്രം സ്വന്തമായ തന്ത്രം.

ഗോ പറഞ്ഞ് പ്ലേറ്റുകൾ കൊട്ടി ഒച്ചയുണ്ടായിക്കിയിട്ടും പോകാത്ത കൊറോണയെ വിളിച്ചു വരുത്തി കൊല്ലുക എന്നതാണ് പ്രധാനമന്ത്രിയുടെ ലക്ഷ്യം. വേദങ്ങളും ഉപനിഷത്തുക്കളും മനപ്പാഠമാക്കിയ മോദിജി യാഗങ്ങളുടേയും ഹോമങ്ങളുടേയും പിന്നിലുള്ള സയന്റിഫിക് വശമാണ് കൊറോണ പ്രതിരോധത്തിനായി പ്രയോഗിക്കാൻ പോകുന്നത്.

മറക്കണ്ട, രാത്രി ഒൻപതിന് ഒൻപത് മിനിറ്റ്. വിളക്ക് മെഴുകു തിരി. ഒൻപത് മണിക്ക് ഹോമം തുടങ്ങുമ്പോഴും ഒൻപതേ ഒൻപതിന് ഗോമം അവസാനിക്കുമ്പോഴും ശബ്ദമുണ്ടാക്കി കൊറോണകളെ പേടിപ്പിച്ച് ഓടിക്കാതെ എട്ടര മുതൽ നിശബ്ദത പാലിക്കണം.

ചില ഉദാഹരണങ്ങൾ
1. തവള കല്യാണം നടത്തി ബിജെപി സർക്കാരുകൾ ഭരിക്കുന്ന സംസ്ഥാനങ്ങളിൽ മഴ പെയ്യിച്ച നിരവധി സംഭവങ്ങൾ
2. ഗോമൂത്രത്തിൽ നന്നും സ്വർണ്ണം വേർതിരിച്ചെടുത്ത് കയറ്റിയയച്ച് നമ്മൾ നേടിയ വിദേശ നാണ്യ ശേഖരം
3. രണ്ടായിരം രൂപയുടെ കറൻസിനോട്ടിൽ അതിവിഗദ്ധമായി നമ്മൾ ചിപ്പ് ഘടിപ്പിച്ചത്

ഇനിയുമുണ്ട് നിരവധി

നബി – ചാണക വാട്സപ്പ് യൂണിവേഴ്സിറ്റിക്ക് വേണ്ടി ആർഷഭാരത ശാസ്ത്രീയതയുടെ പ്രചാരണം ലക്ഷ്യമാക്കി എഴുതിയത്..