സ്വപ്ന സുരേഷിന് മുഖ്യമന്ത്രിയുടെ ഓഫീസുമായി അടുത്ത ബന്ധം: ഐടി വകുപ്പിലെ നിയമനത്തിന് മുഖ്യമന്ത്രിയും ഐടി വകുപ്പ് സെക്രട്ടറി എം ശിവശങ്കറും ഒത്താശ ചെയ്തു: കെ സുരേന്ദ്രന്‍

തിരുവനന്തപുരം: സ്വര്‍ണക്കടത്ത് കേസിലെ മുഖ്യപ്രതിയെന്ന് സംശയിക്കുന്ന സ്വപ്ന സുരേഷിന് മുഖ്യമന്ത്രിയുടെ ഓഫീസുമായി അടുത്ത ബന്ധമെന്ന് ബി.ജെ.പി സംസ്ഥാന അധ്യക്ഷന്‍ കെ സുരേന്ദ്രന്‍ ആരോപിച്ചു. ഐടി വകുപ്പിലെ നിയമനത്തിന് മുഖ്യമന്ത്രിയും ഐടി വകുപ്പ് സെക്രട്ടറി എം ശിവശങ്കറും ഒത്താശ ചെയ്തുവെന്നും സുരേന്ദ്രന്‍ ആരോപിച്ചു. ക്രൈംബ്രാഞ്ച് അന്വേഷിക്കുന്ന കേസില്‍ ഇവരെ രണ്ടു തവണ ചോദ്യം ചെയ്തിരുന്നതായും സുരേന്ദ്രന്‍ ആരോപിച്ചു. ഐടി സെക്രട്ടറി ശിവശങ്കരന്റെ ഫോണിലെ കോള്‍ ലിസ്റ്റ് പരിശോധിക്കണമെന്നും സുരേന്ദ്രന്‍ ആവശ്യപ്പെട്ടു.

സ്വപ്‌ന സുരേഷ് മുഖ്യമന്ത്രിയുടെ ഓഫീസും ഐടി വകുപ്പുമായി ബന്ധപ്പെട്ട് ചുറ്റിത്തിരിഞ്ഞ് നടക്കുന്നതായി രഹസ്യാന്വേഷണ വിഭാഗം മുഖ്യമന്ത്രിയെ ധരിപ്പിച്ചിരുന്നു. മുഖ്യമന്ത്രിയുടെ ഓഫീസിന് ചീത്തപ്പേര് ഉണ്ടാക്കുമെന്നും മുന്നറിയിപ്പ് നല്‍കിയിരുന്നു. തിരുവനന്തപുരം യുഎഇ കോണ്‍സുലേറ്റ് വഴിയുള്ള സ്വര്‍ണകടത്ത് കേസില്‍ മുഖ്യ ആസൂത്രക ഐടി വകുപ്പിലെ ഉദ്യോഗസ്ഥയായ സ്വപ്ന സുരേഷെന്നാണ് കസ്റ്റംസ് വ്യക്തമാക്കുന്നത്. വിവാദമായതോടെ സ്വപ്നെയ ഐടി വകുപ്പില്‍ നിന്ന് പിരിച്ചുവിട്ടു.

Loading...

തിരുവനന്തപുരം കോൺസുലേറ്റ് സ്വർണക്കടത്ത് കേസിലെ മുഖ്യ ആസൂത്രക സ്വപ്‌ന സുരേഷിനെതിരെ കൂടുതൽ ആരോപണങ്ങൾ. സ്വപ്‌ന സുരേഷിന്റെ ഫ്‌ളാറ്റിൽ ഐടി സെക്രട്ടറി സ്ഥിരം സന്ദർശകനാണെന്ന് അയൽവാസി പറഞ്ഞു. ഐടി സെക്രട്ടറി തന്റെ ഔദ്യോഗിക കാറിൽ വരാറുണ്ടായിരുന്നു. ഫ്‌ളാറ്റിൽ മദ്യ സത്കാരം പതിവായിരുന്നുവെന്നും അയൽവാസി പറഞ്ഞു. മുടവൻ മുകൾ ട്രാവൻകൂർ റസിഡൻസിയിലാണ് സ്വപ്‌ന താമസിച്ചിരുന്നത്. നാല് വർഷത്തോളം സ്വപ്‌ന ഇവിടെ ഉണ്ടായിരുന്നു. അവസാനത്തെ രണ്ട് വർഷമാണ് ഐടി സെക്രട്ടറി ഇവിടെ എത്തിയത്. പുറത്തുനിന്നുള്ള പലരും എത്തിയിരുന്നു. സ്ഥിരം മദ്യപാനം ഉണ്ടായിരുന്നു. കുഴഞ്ഞ അവസ്ഥയിലാണ് പലപ്പോഴും വീട്ടിൽ വന്നു കയറുന്നത്. സെക്യൂരിറ്റി ഇവർക്കെതിരെ പരാതി പറഞ്ഞിട്ടുണ്ട്. ഒരിക്കൽ സെക്യൂരിറ്റിയെ ഇവരുടെ ഭർത്താവ് മർദിച്ച് പൊലീസ് കേസായി. അത് ഒതുക്കി തീർക്കുകയായിരുന്നുവെന്നും അയൽവാസി പറഞ്ഞു