ഡിഎംക നേതാവ് സ്റ്റാലിനെതിരെ മക്കള്‍ നീതി മയ്യം നേതാവ് കമല്‍ഹാസന്‍ രംഗത്ത്. മക്കള്‍ നീതി മയ്യത്തിന്റെ ആശയങ്ങളെല്ലാം തന്നെ ഡിഎംകെ മോഷ്ടിച്ചു എന്നാണ് കമല്‍ഹാസന്‍ ആരോപിക്കുന്നത്. വീട്ടുജോലിക്ക് ശമ്പളം, പ്രതിവര്‍ഷം 10 ലക്ഷം തൊഴിലവസരങ്ങള്‍, ദാരിദ്ര്യരേഖക്ക് താഴെയുള്ളവര്‍ക്ക് പിന്തുണ തുടങ്ങിയ ആശയങ്ങള്‍ മുഴുവന്‍ മക്കള്‍ നീതി മയ്യത്തിന്റെ ആണെന്നും ഇത് ഡിഎംകെ മോഷ്ടിച്ചു എന്നുമാണ് കമല്‍ഹാസന്റെ ആരോപണം. സ്ത്രീകള്‍ക്ക് വീട്ടുജോലി പരിഗണിച്ച് മാസം 1000 രൂപ നല്‍കുമെന്നാണ്?ഡി.എം.കെയുടെ പ്രകടന പത്രികയിലെ വാഗ്ദാനം. കൂടാതെ പ്രതിവര്‍ഷം 10 ലക്ഷം തൊഴില്‍ സൃഷ്ടിക്കുമെന്നും കുടുംബത്തിന്റെ വരുമാനം ഉയര്‍ത്തുമെന്നും വാഗ്ദാനം ംനല്‍കിയിട്ടുണ്ട്.
‘തമിഴ്നാട്ടിലെ എല്ലാ വീട്ടമ്മമാര്‍ക്കും മാസം 1000 രൂപ ശമ്പളം നല്‍കാന്‍ പോകുന്നു. ഇതിന്റെ ഫലമായി പൊതു വിതരണ സംവിധാനത്തിലൂടെ ഭക്ഷ്യവസ്തുക്കള്‍ ഉള്‍പ്പെടെയുള്ളവ എല്ലാ കുടുംബങ്ങള്‍ക്കും ലഭ്യമാകും’ -തിരുച്ചിറപ്പിള്ളിയില്‍ നടന്ന റാലിക്കിടെ ഡി.എം.കെ അധ്യക്ഷന്‍ എം.കെ. സ്റ്റാലിന്‍ പ്രസ്താവിച്ചു.’അദ്ദേഹം ഞങ്ങളുടെ ആശയങ്ങള്‍ പകര്‍ത്തി അവരുടേതാക്കി മാറ്റി. നേരത്തേ ഞാന്‍ പറഞ്ഞു വീട്ടമ്മമാര്‍ക്ക് ശമ്പളം ഉറപ്പാക്കുമെന്ന്, ഇപ്പോള്‍ അദ്ദേഹം പറയുന്നു വീട്ടമ്മമാര്‍ക്ക് 1000 രൂപ വീതം നല്‍കുമെന്ന്. ഇത്തരമൊരു വാഗ്ദാനം നല്‍കിയ ആദ്യ രാഷ്ട്രീയ പാര്‍ട്ടി ഞങ്ങളുടേതാണ്’ -കമല്‍ ഹാസന്‍ പറഞ്ഞു. അധികാരത്തിലെത്തിയാല്‍ വീട്ടമ്മമാര്‍ക്ക് മാസ ശമ്പളം ഉറപ്പാക്കുമെന്നായിരുന്നു കമല്‍ ഹാസന്റെ പ്രഖ്യാപനം.
