കൊച്ചിയിലെ ഭക്ഷ്യവിഷബാധ; ചികിത്സ തേടിയവരുടെ എണ്ണം പതിനേഴ് ആയി

കൊച്ചി: കൊച്ചിയിൽ കുഴിമന്തി കഴിച്ച പതിനേഴ് പേർ ഭക്ഷ്യവിഷബാധയെ തുടർന്ന് ചികിത്സ തേടി. പറവൂരിലെ ഹോട്ടലിൽ നിന്ന് കുഴിമന്തി കഴിച്ച രണ്ട് കുട്ടികൾ അടക്കം പതിനേഴ് പേരെ പറവൂർ താലൂക്ക് ആശുപത്രിയിൽ പ്രവേശിപ്പിച്ചു. കൂടുതൽ പേർക്ക് അസ്വസ്ഥത അനുഭവപ്പെട്ടതായാണ് വിവരം.

ഒരു യുവതിയുടെ നില ഗുരുതരമാണ് . ഇവരെ താലൂക്ക് ആശുപത്രിയിൽ നിന്ന് എറണാകുളം മെഡിക്കൽ കോളേജിലേക്ക് മാറ്റി. പറവൂരിലെ മജ്‌ലിസ് ഹോട്ടലിൽ നിന്ന് കുഴിമന്തിയും അൽഫാമും കഴിച്ചവർക്കാണ് ഭക്ഷ്യവിഷബാധ ഉണ്ടായത്. ഭക്ഷണം കഴിച്ചതിനെ തുടർന്ന് ആളുകൾക്ക് ഛർദിയും വയറിളക്കവും അനുഭവപ്പെടുകയായിരുന്നു. കുഴിമന്തി റൈസ് മാത്രം കഴിച്ചവർക്ക് പ്രശ്നമൊന്നുമില്ല.

Loading...

സംഭവത്തിന് പിന്നാലെ മുൻസിപ്പാലിറ്റി ആരോഗ്യവിഭാഗം ഉദ്യോഗസ്ഥർ സ്ഥലത്തെത്തി കട അടപ്പിച്ചു. ആരോഗ്യവകുപ്പ് നടത്തിയ പരിശോധനയിൽ കഴിഞ്ഞ ദിവസം ഇവരുടെ വേറൊരു ഹോട്ടലിൽ പഴയ ചായപ്പൊടിയിൽ നിറം ചേർത്തത് പിടികൂടിയിരുന്നു. സംഭവത്തിൽ ഹോട്ടലിനെതിരെ നടപടി എടുത്തിരുന്നു. ഇതിന് പിന്നാലെയാണ് ഈ സംഭവം. നാട്ടുകാരും വലിയ പ്രേതിഷേധത്തിലാണ്