കൊല്ലം: കൊട്ടാരക്കരയില്‍ വൃദ്ധരെ കബളിപ്പിച്ച് എ.ടി.എമ്മില്‍ നിന്ന് പണം തട്ടിയ സംഭവത്തില്‍ പിടിയിലായ പത്തൊന്‍പതുകാരിയെ കുടുക്കിയത് അതിബുദ്ധി. എ.ടി.എമ്മില്‍ നിന്ന് പണം എടുക്കാന്‍ ബുദ്ധിമുട്ടുന്ന വിദ്യാര്‍ഥിനികളും പ്രായമായ സ്ത്രീകളേയും സഹായിക്കാനെന്ന വ്യാജേനെയാണ് പുത്തൂര്‍ സ്വദേശിനി ബിന്ധ്യ തട്ടിപ്പ് നടത്തിയിരുന്നത്. കോട്ടത്തല സ്വദേശിയായ സരളയെന്ന വൃദ്ധയുടെ 39,000 രൂപ കവര്‍ന്നതോടെയാണ് എ.ടി.എം തട്ടിപ്പിന്റെ ചുരുള്‍ നിവരുന്നത്. ഇത്തരം തട്ടിപ്പിന് ബിന്ധ്യ എത്തുന്നതിന്റെ ദൃശ്യങ്ങള്‍ സി.സി.ടി.വിയില്‍ പതിഞ്ഞു.

കൊട്ടാക്കര എസ്.ബി.ഐ കൗണ്ടറിന് മുന്‍പില്‍ പകല്‍ മൂന്നരയോടെയായിരുന്നു സംഭവം. ഇതിന്റെ സി.സി ടി.വി ദൃശ്യങ്ങള്‍ ബാങ്കും പൊലീസും പരിശോധിക്കുന്നതിനിടെയാണ് പെണ്‍കുട്ടി വീണ്ടും പണം തട്ടാന്‍ മറ്റാരുടെയോ എ.ടി.എം കാര്‍ഡുമായി കൊട്ടാരക്കരയില്‍ എത്തിയത്. സംശയം തോന്നിയ സെക്യൂരിറ്റിയുടെ ഇടപെടല്‍ യുവതിയെ കുടുക്കുകയായിരുന്നു. വൃദ്ധരെ പണം എടുക്കാന്‍ സഹായിച്ച ശേഷം മറ്റൊരു എ.ടി.എം കാര്‍ഡ് നല്‍കിയ പെണ്‍കുട്ടി പിന്നീട് മറ്റൊരു എ.ടി.എമ്മില്‍ കയറി പണം അക്കൗണ്ടില്‍ തട്ടുകയായിരുന്നു രീതിയെന്ന് പൊലീസ് പറഞ്ഞു. കൊല്ലം ജില്ലയുടെ വിവിധ ഭാഗങ്ങളില്‍ ഒട്ടേറെ സ്ത്രീകള്‍ സമാനമായ രീതിയില്‍ തട്ടിപ്പിന് ഇരയായിട്ടുണ്ട്.

തട്ടിപ്പിന് ഇരയായവരെ പൊലീസ് വിളിച്ചു വരുത്തിയപ്പോഴാണ് അവരുടെ കൈകളില്‍ ഉള്ളത് സ്വന്തം കാര്‍ഡല്ലെന്ന് ബോധ്യമാകുന്നത്.നേരത്തെ പല തവണയും യുവതി കൊട്ടാരക്കരയിലെ എ.ടി.എം കൗണ്ടറുകളില്‍ എത്തിയതിന്റെ തെളിവുകളും പൊലീസിന് ലഭിച്ചിട്ടുണ്ട്.

കൊട്ടാരക്കരയില്‍ യുവതി നടത്തിയ എടിഎം കവര്‍ച്ച; കുടുക്കിയതു അതിബുദ്ധി

Posted by WorldMalayali on Saturday, August 8, 2015