കെപി ശശികല വീണ്ടും ശബരിമലയ്ക്ക്; പുലര്‍ച്ചെ എരുമേലിയിലെത്തി

പമ്പ: ഹിന്ദു ഐക്യവേദി സംസ്ഥാനഅധ്യക്ഷ കെപി ശശികല ശബരിമല ദര്‍ശനത്തിനായി പുറപ്പെട്ടു. പുലര്‍ച്ചെ എരുമേലിയിലെത്തിയ ശശികല രാവിലെ തന്നെ മലചവിട്ടും. ശശികലയെ തടയില്ലെന്ന് പോലീസ് ഇന്നലെ വ്യക്തമാക്കിയിരുന്നു. എന്നാല്‍ അര്‍ധരാത്രിയുണ്ടായ സംഘര്‍ഷങ്ങളുടെ അടിസ്ഥാനത്തില്‍ എന്തെങ്കിലും നിയന്ത്രണങ്ങള്‍ ഏര്‍പ്പെടുത്തുമോ എന്ന കാര്യം വ്യക്തമല്ല.

വെള്ളിയാഴ്ച രാത്രിയോടെയാണ് കെ.പി.ശശികല ഇരുമുടിക്കെട്ടുമായി മല കയറാനെത്തിയത്. എന്നാല്‍ രാത്രി നട അടയ്ക്കുന്നതിന് രണ്ട് മണിക്കൂര്‍ മുമ്പ് തന്നെ തീര്‍ഥാടകരെ പൊലീസ് നിയന്ത്രിക്കുമെന്ന് വ്യക്തമാക്കിയിരുന്നു. രാത്രി സന്നിധാനത്ത് ആരെയും തങ്ങാന്‍ അനുവദിക്കില്ലെന്ന ഉറച്ച നിലപാടിലായിരുന്നു പൊലീസ്. എന്നാല്‍ രാത്രി സന്നിധാനത്ത് തങ്ങുമെന്ന് വ്യക്തമാക്കി ശശികല മരക്കൂട്ടത്ത് കുത്തിയിരുന്നു.

ഇതോടെയാണ് പൊലീസ് കെ.പി.ശശികലയെ കരുതല്‍ കസ്റ്റഡിയിലെടുത്തത്. പിന്നീട് ശശികലയുടെ അറസ്റ്റ് രേഖപ്പെടുത്തി. ഇതോടെ ശശികലയെ അറസ്റ്റ് ചെയ്തതിനെതിരെ ഹിന്ദു ഐക്യവേദി അര്‍ധരാത്രി ഹര്‍ത്താല്‍ പ്രഖ്യാപിച്ചു. ശനിയാഴ്ച ഉച്ചയോടെ ശശികലയെ കോടതിയില്‍ ഹാജരാക്കി. ശശികലയ്‌ക്കെതിരെ ഇതുവരെ രജിസ്റ്റര്‍ ചെയ്ത ക്രിമിനല്‍ കേസുകളടക്കമുള്ള റിപ്പോര്‍ട്ടും പൊലീസ് കോടതിയില്‍ നല്‍കി. ഇതേത്തുടര്‍ന്ന് മല കയറി ദര്‍ശനം നടത്തി മടങ്ങാമെന്ന ഉറപ്പില്‍ കെ.പി.ശശികലയെ തിരുവല്ല മജിസ്‌ട്രേറ്റ് ജാമ്യത്തില്‍ വിടുകയായിരുന്നു.