‘മോദീ, തൊഴില്‍ ചെയ്യാന്‍ അനുവദിക്കൂ’ തൊഴിലാളിയുടെ കിടിലന്‍ ഇംഗ്ലീഷ്; യെസ് ‘വൈ നോട്ട്?

തെരഞ്ഞെടുപ്പുമായി ബന്ധപ്പെട്ട് ജനങ്ങളുടെ പ്രതികരണം അറിയാന്‍ ഇറങ്ങിയതാണ് ലല്ലന്‍ടോപ്പ് എന്ന ഓണ്‍ലൈന്‍ വാര്‍ത്താ മാധ്യമത്തിന്റെ റിപ്പോര്‍ട്ടര്‍. ഉത്തര്‍പ്രദേശിലെ നോയിഡയില്‍ കൂട്ടം കൂടി നില്‍ക്കുന്ന ആളുകളോട് അദ്ദേഹം തെരഞ്ഞെടുപ്പ് പ്രതീക്ഷകളെപ്പറ്റി ചോദിച്ചു. പല അഭിപ്രായങ്ങളും വരുന്നതിനിടെ 50നു മുകളില്‍ വയസ്സ് തോന്നുന്ന ഒരു കൂലിത്തൊഴിലാളിയുടെ മുന്നിലേക്കും അദ്ദേഹം മൈക്ക് നീട്ടി. ഹിന്ദിയില്‍ സംസാരം ആരംഭിച്ച അദ്ദേഹം ഉടന്‍ തന്നെ ഇംഗ്ലീഷിലേക്ക് മാറി.
”ഐ വാണ്ട് ടു വര്‍ക്ക്”
അത്ഭുതപ്പെട്ട റിപ്പോര്‍ട്ടറുടെ ചോദ്യം: ”ഇംഗ്ലീഷ്?”
കൂലിത്തൊഴിലാളിക്കുണ്ടായിരുന്നത് ഒരു മറുചോദ്യമായിരുന്നു: ”യെസ്. വൈ നോട്ട്?”
”ഐ വാണ്ട് ടു വര്‍ക്ക്. ഐ ആം സെയിംഗ് മോദി ടു അലോ ദ വര്‍ക്ക്. ഡോണ്ട് ഗെറ്റ് ഡെയിലി വര്‍ക്ക്.”- അദ്ദേഹം തുടര്‍ന്നു. പിന്നീട് സംസാരം വീണ്ടും ഹിന്ദിയിലാക്കി. മോദി സര്‍ക്കാരിന്റെ നയങ്ങളെ രൂക്ഷമായി വിമര്‍ശിച്ചു കൊണ്ടായിരുന്നു അദ്ദേഹത്തിന്റെ സംസാരം. തൊഴിലില്ലായ്മയുടെ ഭീകരത ചൂണ്ടിക്കാട്ടിയ അദ്ദേഹം ആവശ്യത്തിനു തൊഴില്‍ ഉറപ്പാകാന്‍ സര്‍ക്കാര്‍ സന്നദ്ധരാകണമെന്നും അറിയിച്ചു.

ഹിന്ദിയും ഇംഗ്ലീഷും മാറിമാറി സംസാരിക്കുന്നതിനിടെ അദ്ദേഹം ഏതു വരെ പഠിച്ചു എന്നായി റിപ്പോര്‍ട്ടറുടെ ചോദ്യം. ബിരുദധാരിയാണ് താന്‍ എന്ന മറുപടി കേട്ട് വീണ്ടും റിപ്പോര്‍ട്ടര്‍ക്ക് അത്ഭുതം. ഡിഗ്രി കഴിഞ്ഞിറങ്ങിയ സമയത്തെ ഇന്ദിരാഗാന്ധി സര്‍ക്കാരിനെക്കുറിച്ചും ഇപ്പോഴത്തെ മോദി സര്‍ക്കാരിനെക്കുറിച്ചുമൊക്കെ അദ്ദേഹം വിശദമായി സംസാരിക്കുന്നതും വീഡിയോയില്‍ കാണാം.

ഉത്തര്‍പ്രദേശിലെ നോയിഡ കേന്ദ്രമാക്കി പ്രവര്‍ത്തിക്കുന്ന ഓണ്‍ലൈന്‍ വാര്‍ത്താമാധ്യമമാണ് ലല്ലന്‍ടോപ്പ്. ഹിന്ദി ഭാഷയിലുള്ള ഈ മാധ്യമം സൗരഭ് ദ്വിവേദി എന്ന മാധ്യമപ്രവര്‍ത്തകന്റെ ഉടമസ്ഥതയിലുള്ളതാണ്. പൊളിറ്റിക്കല്‍ കിസ്സെ എന്ന വെബ് സീരീസിലൂടെ പ്രശസ്തനായ വ്യക്തിയാണ് സൗരഭ് ദ്വിവേദി.