മാതാപിതാ, ഗുരു, ദൈവം…
മാതാപിതാക്കള്‍ക്ക് മാത്രമെ അറിയൂ, മക്കളെ വളര്‍ത്തി വലുതാക്കുന്നതിന്റെ ബുദ്ധിമുട്ടുകള്‍. അവര്‍ കഴിക്കുന്നതിലും ഉടുക്കുന്നതിലും അല്ല അവരുടെ ശ്രദ്ധ. മക്കളെ കഴിപ്പിക്കാനും ഉടുപ്പിക്കാനുമാണ് അവര്‍ ശ്രദ്ധിക്കുക. മക്കളുടെ കാലില്‍ ഒരു മുള്ളുതറക്കുന്നതുപോലും സ്നേഹമുള്ള മാതാപിതാക്കള്‍ക്ക് താങ്ങാനാവില്ല. അങ്ങനെ മക്കളെ വളര്‍ത്തി വലുതാക്കുന്ന മാതാപിതാക്കന്മാരെ മക്കള്‍ സ്വയംപര്യാപ്തത കൈവരിക്കുന്ന സമയത്ത് പുച്ഛിച്ചുതള്ളി നഴ്സിങ് ഹോമിലും, അനാഥാലങ്ങളിലും കൊണ്ടിടുന്ന പ്രവര്‍ത്തി പ്രപഞ്ചം പോലും പൊറുക്കില്ല. മക്കളെ സ്നേഹിക്കാത്ത മാതാപിതാക്കന്മാര്‍ ഉണ്ടായിരിക്കം, അവരെപ്പോലും മക്കള്‍ ബഹുമാനിച്ചെ മതിയാവൂ. കാരണം നമ്മള്‍ എന്ന വ്യക്തി തന്നെ അവര്‍ തന്ന ജീവനാണ്.
താഴെ ഫേസ്ബുക്കില്‍ കണ്ട ഒരു പോസ്റ്റ് കൂടി ചേര്‍ക്കുന്നു; അതാരാണ് എഴുതിയതെന്നത് അറിയില്ല, എന്നിരുന്നാലും അതിലെ സത്യങ്ങള്‍ വായിക്കുക, ചിന്തിക്കുക
അമ്മ പറഞ്ഞ നുണകള്‍
**************************
1) ദാരിദ്ര്യം… നിറഞ്ഞുനിന്നിരുന്ന ആ വീട്ടില്‍ എല്ലാ ദിവസവും രാത്രി ഭക്ഷണം കഴിക്കുമ്പോള്‍ മകന്‍റെ പാത്രത്തിലേക്ക് തന്റെ പങ്കുകൂടി അമ്മ ഇട്ടുകൊടുക്കുമായിരുന്നു. അമ്മക്ക് വേണ്ടേ എന്ന മകന്‍റെ ചോദ്യത്തിന് എനിക്കു വിശപ്പില്ലെന്നായിരുന്നു അമ്മയുടെ സ്ഥിരമായ മറുപടി.
2) വളരെ അപൂര്‍വമായിട്ടായിരുന്നു വീട്ടില്‍ മീന്‍ വാങ്ങിയിരുന്നത്. കഷണങ്ങള്‍ മകന് നല്‍കിയിട്ട് മുള്ളുകള്‍ മാത്രമായിരുന്നു അമ്മ കഴിച്ചിരുന്നത്. മീന്‍ കഷണങ്ങള്‍ ഇഷ്ട്ടമല്ലെന്നായിരുന്നു അമ്മ പറഞ്ഞിരുന്നത്.
3) മകന്‍റെ പഠനത്തിനായി അടുത്തുള്ള തീപ്പട്ടികമ്പനിയില്‍ അമ്മ ജോലിക്ക് പോയിരുന്നു. ഫാക്ടറിയില്‍നിന്നും സാധനങ്ങള്‍ കൊണ്ടുവന്നു രാത്രികളില്‍ വീട്ടിലിരുന്നും അമ്മ ജോലി ചെയ്യുമായിരുന്നു.ഒരു തണുപ്പുള്ള രാത്രിയില്‍ മകന് ഉറക്കം തെളിഞ്ഞപ്പോള്‍ ജോലി ചെയ്യുന്ന അമ്മയെ ആണ് കണ്ടതു , അമ്മ എന്താണു കിടക്കാത്തതെന്നുള്ള ചൊദ്യത്തിനു ഉറക്കം വരുന്നില്ലെന്നായിരുന്നു ഉത്തരം.
4)പിതാവിന്റെ പെട്ടന്നുള്ള മരണം അമ്മയുടെയും മകന്‍റെയും ജീവിതം കൂടുതല്‍ ദുഷ്കരമാക്കി. ബന്ധുക്കളും സുഹൃത്തുക്കളുമൊക്കെ മറ്റൊരു വിവാഹത്തിനു നിര്‍ബന്ധിച്ചെങ്കിലും സ്നേഹിക്കാനുള്ള മനസ്സ് നഷ്ട്ടമായതുകൊണ്ട് വിവാഹം വേണ്ടാ എന്നാണ് അമ്മ എല്ലാവരോടും പറഞ്ഞതു.
5) മകന് പത്താം ക്ലാസ് പരീക്ഷക്കായി അര്‍ദ്ധരാത്രി വരെ പഠിക്കുമ്പോള്‍ അമ്മയും അവനോടൊപ്പം ഉറങ്ങാതിരിക്കുമായിരുന്നു. രാത്രിയില്‍ മകനു ചായ കൊടുക്കുമ്പോള്‍ അമ്മ എന്താണ് ചായ കുടിക്കാത്തതെന്നു ചോദിക്കുമ്പോള്‍ രാത്രിയില്‍ ചായ ഇഷ്ട്ടമല്ലെന്നയിരുന്നു മറുപടി.
6) കോളേജ് വിദ്യാഭ്യാസത്തിനായി മകന് പട്ടണത്തിലേക്കാണ് പോയത്. പഠനത്തോടൊപ്പം ഒരു ജോലിയും അവനു ലഭിച്ചു. അമ്മയുടെ കഷ്ടപ്പാടുകളെക്കുറിച്ചു ബോധ്യമുണ്ടായിരുന്നതുകൊണ്ട് അവന്‍ ചിലവുകള്‍ ചുരുക്കി ചെറിയൊരു തുക അമ്മക്കയച്ചുകൊടുത്തു. എനിക്കിപ്പോള്‍ പണത്തിനു യാതൊരു ബുദ്ധിമുട്ടുമില്ല, ഭക്ഷണ കാര്യങ്ങളില്‍ നീ കൂടുതല്‍ ശ്രദ്ധിക്കണമെന്നുള്ള കുറിപ്പോടെ അമ്മ ആ പണം തിരിച്ചയച്ചു.
7) വിദ്യാഭ്യാസം കഴിഞ്ഞ ഉടന്‍തന്നെ അവനു വിദേശത്തു ജോലി ലഭിച്ചു. അമ്മയെ കൂടി കൊണ്ടുപോവാനായിരുന്നു മകന്‍റെ പദ്ധതി.പക്ഷേ, ഉയര്‍ന്ന നിലയിലോന്നും ജീവിക്കാന്‍ ഇഷ്ടമില്ലെന്നുപറഞ്ഞു അമ്മ പോകാന്‍ തയ്യാറായില്ല ( താന്‍കൂടി ചെന്നാല്‍ വിദേശത്തെ ചെലവ് താങ്ങാന്‍ മകനു കഴിയില്ലെന്നു അമ്മക്ക് അറിയാമായിരുന്നു).
അമ്മക്ക് കാന്‍സര്‍ ആണെന്നുള്ള വിവരമറിഞ്ഞാണ് മകന് നാട്ടിലേക്കു വന്നത്‌. പാതി മറഞ്ഞ ബോധാത്തിനിടയിലും ആശുപത്രിയിലെ കിടക്കയില്‍വെച്ചു മകനെ നോക്കി ചിരിച്ചുകൊണ്ട് അമ്മ പറഞ്ഞു തീരെ വേദനയില്ലെന്നു. പിറ്റേ ദിവസം അമ്മ മരിക്കുകയും ചെയ്തു.. അമ്മമാരുടെ സ്നേഹത്തിനു ചിലപ്പോള്‍ നുണയുടെ രൂപമുണ്ടാവും. ഓരോ നുണകളും അമ്മമാരുടെ ഓരോ ത്യാഗങ്ങള്‍ ആയിരുന്നുവെന്നു എല്ലാ മക്കളും അറിയുന്നു. എന്നിട്ടും എത്രയോ അമ്മമാരാണ് ഓരോ ദിവസവും വഴിയരികുകളിലും അനാഥാലയങ്ങളിലും ഉപേക്ഷിക്കപെടുന്നത് ഒരുനിമിഷം തന്റെ അമ്മ തനിക്കുവേണ്ടി സഹിച്ചിട്ടുള്ള കഷ്ടപ്പാടുകള്‍ ഓര്‍ത്തു നോക്കൂ. അപ്പോള്‍ അറിയാം … എല്ലാത്തിനെക്കാളും ഏതിനെക്കളും ശ്രേഷ്ഠം മാതാവു തന്നെ ………
പിതാവിന്റെ കഷ്ടപ്പാടുകളെക്കുറിച്ചും ഓര്‍മ്മിച്ചുകൊണ്ട്…
