കൊലക്കേസ് അന്വേഷണത്തിനിടെ പുറത്ത് വന്നത് 27 മോഷണക്കേസുകളെ കുറിച്ചുള്ള വിവരങ്ങള്‍

മക്കിയാട്: കൊലപാതക കേസ് അന്വേഷണത്തിനിടെ പുറത്ത് വന്നത് മോഷണക്കേസുകളെ കുറിച്ചുള്ള വിവരങ്ങള്‍. മക്കിയാട് കൊലപാതക കേസിലെ അന്വേഷണത്തിനിടെ നടത്തിയ ചേദ്യം ചെയ്യലിലാണ് വയനാട് ജില്ലയിലെ 27 മോഷണക്കേസുകളെ കുറിച്ചുള്ള വിവരങ്ങള്‍ പുറത്തുവന്നത്. കഴിഞ്ഞ ജൂലൈ ആറിനാണ് മക്കിയാട് കൊലപാതകങ്ങള്‍ നടന്നത്.

പൂരിഞ്ഞി വാഴയില്‍ ഉമ്മര്‍-ഫാത്തിമ ദമ്പതികളെ കിടപ്പറയില്‍ കൊലപ്പെടുത്തിയ കേസിലെ അന്വേഷമവുമായി ബന്ധപ്പെട്ടുള്ള അന്വേഷണത്തിലാണ് മോഷമക്കേസുകള്‍ക്ക് തുമ്പുണ്ടായത്. വിവിധ കേസുകളിലായി 16 കള്ളന്മാരെ പിടികൂടുകയും ചെയ്തു.

ഇരട്ടക്കൊല അന്വേഷണത്തിനായി മാനന്തവാടി ഡിവൈഎസ്പി കെ എം ദേവസ്യയുടെ നേതൃത്വത്തില്‍ രൂപീകരിച്ച പ്രത്യേക അന്വേഷണസംഘം രണ്ടു മാസത്തിനിടെ 700 കള്ളന്മാരെയാണ് ചോദ്യം ചെയ്തത്. മോഷണത്തിനിടെയായിരുന്നു കൊലപാതകം എന്നു സാഹചര്യത്തെളിവുകളുണ്ടായതാണ് അന്വേഷണം കള്ളന്മാരെ കേന്ദ്രീകരിച്ചാകാന്‍ കാരണം.

വയനാട്, കോഴിക്കോട് ജില്ലകളില്‍ മോഷണം, ഭവനഭേദനം, സംഘം ചേര്‍ന്നുള്ള കവര്‍ച്ച തുടങ്ങിയ കേസുകളില്‍ നേരത്തേ അറസ്റ്റിലായവരെ ചുറ്റിപ്പറ്റിയായിരുന്നു പൊലീസ് നീക്കം. ഇവരെയെല്ലാം കസ്റ്റഡിയിലെടുത്ത് വീണ്ടും ചോദ്യം ചെയ്തതോടെയാണ് 27 മോഷണക്കേസുകള്‍ക്ക് തുമ്പുണ്ടായത്.