മലപ്പുറം : മുട്ടയുടെ മഞ്ഞക്കരുവിന് പച്ചനിറമോ. ആലോചിക്കുമ്പോൾ തന്നെ അത്ഭുതം തോന്നുന്നുണ്ട് അല്ലേ. സംഭവം സത്യമാണ്. അതോ മലപ്പുറത്ത്. മലപ്പുറത്തെ ഒതുക്കുങ്ങൽ ഗാന്ധിനഗറിലെ അമ്പലവൻ കുളപ്പുരയ്ക്കൽ ശിഹാബിന്റെ വീട്ടിൽവളർത്തുന്ന ഏഴുകോഴികൾ ഇടുന്ന മുട്ടയുടെ ഉണ്ണി(കരു)ക്കാണ് പച്ചനിറം. ശിഹാബ് വർഷങ്ങളായി വിവിധ ഇനത്തിലുള്ള കോഴികളെ വീട്ടിൽ വളർത്തുന്നുണ്ട്. ഇതിൽ പ്രധാനമായും നാടൻ, കരിങ്കോഴി, ഫാൻസി കോഴികൾ എന്നിവയുണ്ട്.
മാസങ്ങൾക്കുമുൻപ് ഒരു കോഴിമുട്ട വറുക്കാനായി പൊട്ടിച്ചപ്പോഴാണ് നിറംമാറ്റം വീട്ടുകാരുടെ ശ്രദ്ധയിൽപ്പെട്ടത് അത് കേടാണെന്ന് കരുതി കളഞ്ഞു. എന്നാൽ പിന്നീട് ഉണ്ടായ മുട്ടയുടെ കരുവിനും അതേ നിറം. ഇതോടെ പച്ചക്കരുവുള്ള എല്ലാ മുട്ടകളും വിരിയിക്കാൻ തീരുമാനിച്ചു. വിരിഞ്ഞിറങ്ങിയവ വലുതായി, മുട്ടയിട്ടതോടെ അവയിലെ കരുക്കൾക്കും പച്ചനിറം തന്നെ. ആകെ ഒരു പച്ചമയം. ഇപ്പോൾ ആകെയുള്ള ഏഴ് കോഴികൾ ഇടുന്ന മുട്ടയുടെ കരുവിന് പച്ചനിറം. മുട്ടയുടെ പച്ചക്കരു സോഷ്യൽ മീഡിയയിൽ അടക്കം ചർച്ചയായതോടെ വിഷയം വെറ്ററിനറി സർവകലാശാല അധികൃതരുടെ അടുത്തെത്തി. കോഴികൾക്ക് നൽകുന്ന തീറ്റയിൽ പച്ചപ്പട്ടാണി(ഗ്രീൻപീസ്) കൂടുതലെങ്കിൽ ഇതിനു സാധ്യതയുണ്ടെന്നാണ് അവരുടെ അഭിപ്രായം. എന്തായാലും വെറ്ററിനറി സർവകലാശാല ഇതിനെക്കുറിച്ച് കൂടുതൽ അന്വേഷിക്കാൻ തീരുമാനിച്ചിരിക്കുകയാണ്. അതേസമയം ശിഹാബിന്റെ വീട്ടിൽ ഇതൊന്നും കോഴികൾക്ക് നൽകുന്നില്ല. എന്നിട്ടും ഇതിന്റെ നിറംമാറിയത് എങ്ങനെ എന്നു പഠിക്കാനുള്ള തയ്യാറെടുപ്പിലാണ് സർവകലാശാല അധികൃതർ.
നാട്ടിൽ പച്ച കോഴിമുട്ടയുടെ കാര്യം ശിഹാബിന്റെ കോഴികൾക്കും മുട്ടക്കും നാട്ടിൽ ഏറെ ആവശ്യക്കാരാണുള്ളത്. ഗ്രീൻപീസ് കൂടുതലായി തീറ്റയിൽ ഉൾപ്പെടുത്തിയപ്പോൾ മുട്ടയുടെ കരുവിന് പച്ചനിറം കണ്ടതായി നേരത്തേ റിപ്പോർട്ടുകളുണ്ടെന്ന് കേരള വെറ്ററിനറി സർവകലാശാലയിലെ പൗൾട്രി വിഭാഗം അസിസ്റ്റന്റ് പ്രൊഫസർ ഡോ. എസ് ഹരികൃഷ്ണൻ പറയുന്നു. എന്നാൽ അങ്ങനെയൊന്നും തന്റെ കോഴികൾക്ക് നൽകിയിട്ടില്ലെന്നാണ് ശിഹാബ് പറയുന്നത്.
