സിനിമ നിരോധിച്ച് പ്രാര്‍ത്ഥനാ സംഘങ്ങള്‍ രൂപീകരിക്കൂ: മുരളി ഗോപി.

സമൂഹത്തില്‍ നടക്കുന്ന അക്രമങ്ങള്‍ക്കും മറ്റും ഉത്തരവാദി സിനിമയാണെങ്കില്‍ അത് നിരോധിച്ച് പ്രാര്‍ത്ഥനാസംഘങ്ങള്‍ക്ക് പ്രാധാന്യം കൊടുക്കൂവെന്ന് നടനും തിരക്കഥാകൃത്തുമായ മുരളി ഗോപി. സിനിമകള്‍ക്കെതിരെ നടക്കുന്ന ആരോപണങ്ങള്‍ക്കെതിരെ ഫേസ്ബുക്കിലൂടെയാണ് മുരളി ഗോപി ആഞ്ഞടിച്ചത്.
 
അതെ, നമുക്ക് ചുറ്റും നടക്കുന്ന എല്ലാ കാര്യങ്ങളുടെയും ഉത്തരവാദി സിനിമയാണ്. റിച്ചാര്‍ഡ് ആറ്റന്‍ബറോയുടെ ഗാന്ധി സിനിമ കണ്ടവരെല്ലാം ഗാന്ധിസം രക്തത്തില്‍ അലിഞ്ഞ് ചേര്‍ന്നവരായി മാറി. പാഷന്‍ ഓഫ് ദി ക്രൈസ്റ്റ് കണ്ടവര്‍ കരുത്തുള്ള ക്രൈസ്തവരായി മാറി. കൊപ്പോളയുടെ ഗോഡ്ഫാദര്‍ കണ്ടവര്‍ ക്രൂരന്മാരായ ഗ്യാങ്‌സ്റ്റേഴ്‌സ് ആയി മാറി. അതുപോലെ പ്രേമം കണ്ട യുവാക്കളെല്ലാം വഴിതെറ്റിയവരുമായി.
 
അതുകൊണ്ട് സിനിമ നിരോധിച്ച് പ്രാര്‍ത്ഥനാ സംഘങ്ങള്‍ രൂപീകരിക്കൂ, അപ്പോള്‍ കാണാം, ലോകത്തിന്റെ സുരക്ഷിതമായ പരിണാമം.ലോകമഹായുദ്ധങ്ങളില്ലാത്ത, സ്വേച്ഛാധിപതികളില്ലാത്ത, മാനഭംഗങ്ങളോ, കൊള്ളയോ രക്തച്ചൊരിച്ചിലുകളോ ഇല്ലാത്ത ലോകത്തിലേക്കുള്ള ലോകം അപ്പോള്‍ കാണാം. ഒപ്പം, യുവാക്കളല്ലാതെ അവരുടെ അധ്യാപകരുമായി പ്രണയത്തിലാകുന്നത് ആരാണെന്നും കാണാം- മുരളി ഗോപി തന്റെ വാളില്‍ കുറിച്ചു.
 
തിരുവനന്തപുരം സിഇടി കോളജിലെ സംഭവത്തിന് കാരണം പ്രേമം സിനിമയാണെന്നുള്ള ആരോപണവുമായി ഡി.ജി.പി സെന്‍കുമാര്‍ കഴിഞ്ഞ ദിവസം രംഗത്തെത്തിയിരുന്നു. ന്യൂജനറേഷന്‍ സിനിമകള്‍ സ്ത്രീ വിരുദ്ധമാണെന്നും സ്ത്രീകള്‍ എങ്ങനെയാണ് ഇത്തരം സിനിമകളെ സഹിക്കുന്നതെന്നും ഡി.ജി.പി ഇന്നലെ ചോദിച്ചിരുന്നു.