ഷഹീന്‍ ചുഴലിക്കാറ്റ്; മസ്‌കത്തിലേക്കുള്ള വിമാന സര്‍വ്വീസുകള്‍ താല്‍കാലികമായി നിര്‍ത്തിവെച്ചു

മസ്‌കത്ത് എയര്‍പോര്‍ട്ടിലേക്കും തിരിച്ചുമുള്ള വിമാന സര്‍വ്വീസുകള്‍ താല്‍കാലികമായി നിര്‍ത്തി വെച്ചതായി സിവില്‍ ഏവിയേഷന്‍ അതോറിറ്റി അറിയിച്ചു. ഷഹീന്‍ ചുഴലിക്കാറ്റിനെ തുടര്‍ന്നുള്ള മുന്‍ കരുതല്‍ എന്ന നിലയിലാണ് വിമാന സര്‍വ്വീസ് നിര്‍ത്തി വെച്ചത്. വിമാനങ്ങളുടെ പുതുക്കിയ ഷെഡ്യൂള്‍ പിന്നീട് അറിയിക്കും.

ഒമാന്‍ തീരത്തോടടുക്കുന്ന ചുഴലിക്കാറ്റ് വൈകീട്ടോടെ തീരം തൊടുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ശനിയാഴ്ച രാത്രി മുതല്‍ മസ്‌കത്ത്, ബാത്തിന ഗവര്‍ണറേറ്റുകളില്‍ കനത്ത മഴയാണ് പെയ്തുകൊണ്ടിരിക്കുന്നത്. വരും മണിക്കൂറുകളില്‍ രാജ്യത്തിന്റെ വിവിധ ഭാഗങ്ങളില്‍ മഴ കൂടുതല്‍ കനക്കും.

Loading...

അതേസമയം, കനത്ത മഴയില്‍ വ്യാപക നാശനഷ്ടങ്ങളാണ് പലയിടത്തുനിന്നും റിപ്പോര്‍ട്ട് ചെയ്യുന്നത്. മസ്‌കത്തടക്കം ഒമാന്റെ വിവിധ പ്രദേശങ്ങള്‍ വെള്ളത്തിനടിയിലാണ്. ചുഴലിക്കാറ്റിനെ തുടര്‍ന്ന് മഴയും കാറ്റും മൂലം താമസ സ്ഥലത്തു വെള്ളം കയറിയതിനാല്‍ നിരവധി കുടുംബങ്ങളെ മസ്‌കറ്റ് ഗവര്ണറേറ്റിലെ അമിറാത്ത് വിലയാത്തിലെ അഭയകേന്ദ്രങ്ങങ്ങളിലേക്കു മാറ്റി പാര്‍പ്പിച്ചു.

റോഡുകളില്‍ വെള്ളം കയറിയതിനാല്‍ പലയിടത്തും ഗതാഗതം തടസ്സപ്പെട്ടിട്ടുണ്ട്. ശനിയാഴ്ച രാത്രിയും ഞായറാഴ്ച പുലര്‍ച്ചെയുമായി മസ്‌കത്ത്, മത്ര ഭാഗങ്ങളില്‍ വീടുകളിലും വാഹനങ്ങളിലും കുടുങ്ങിയ 55 പേരെ രക്ഷിച്ചു. കനത്ത മഴയില്‍ ഒമാനിലെ റുസായില്‍ മലയിടിഞ്ഞു വീണ് രണ്ടു പേര്‍ മരിച്ചു. തൊഴിലാളികള്‍ താമസിക്കുന്ന കെട്ടിടത്തിന് മുകളില്‍ മലയിടിഞ്ഞു വീണാണ് രണ്ടു പേര്‍ മരിച്ചത്.