നിഷ പുരുഷോത്തമനെ അധിക്ഷേപിച്ച സംഭവം; ദേശാഭിമാനി ജീവനക്കാരനോട് വിശദീകരണം തേടി

തിരുവനന്തപുരം : മനോരമ ന്യൂസ് ചാനലിലെ മാധ്യമ പ്രവര്‍ത്തകയായ നിഷ പുരുഷോത്തമനെതിരെ അധിക്ഷേപ പോസ്റ്റ ഇട്ട ജീവനക്കാരനോട് ദേശാഭിമാനി വിശദീകരണം ചോദിച്ചു. ദേശാഭിമാനിയില്‍ ജോലി ചെയ്യുന്ന വിനീത് വി യു വിനോടാണ് വിശദീകരണം ചോദിച്ചത്. ഇയാള്‍ ഫേസ്ബുക്ക് പോസ്റ്റിലൂടെയാണ് നിഷയ്‌ക്കെതിരെ അധിക്ഷേപം നടത്തിയത്. വിശദീകരണം ചോദിച്ചതായി ദേശാഭിമാനി ചീഫ് എഡിറ്റര്‍ പി രാജീവ് അറിയിക്കുകയായിരുന്നു.

ദേശാഭിമാനി പത്രത്തില്‍ സര്‍ക്കുലേഷന്‍ വിഭാഗത്തില്‍ താല്‍ക്കാലികാടിസ്ഥാനത്തില്‍ ജോലി ചെയ്യുന്നയാളുടെ വ്യക്തിപരമായ ഫേസ് ബുക്ക് അക്കൗണ്ടില്‍ നിന്നായിരുന്നു മനോരമ ചാനലിലെ മാധ്യമ പ്രവര്‍ത്തകയെ വ്യക്തിപരമായി അധിക്ഷേപിക്കുന്ന പോസ്റ്റിട്ടത്. ഇത് ശ്രദ്ധയില്‍പ്പെടുകയും ചെയ്തു. ഇത്തരം രീതികളോട് ദേശാഭിമാനിക്ക് യോജിപ്പില്ലെന്ന് പി രാജീവ് തന്റെ ഫേസ്ബുക്കില്‍ കുറിച്ചു.പി.രാജീവിന്റെ ഫേസ്ബുക്ക് പോസ്റ്റ് വായിക്കാം

Loading...

ദേശാഭിമാനിയിൽ സർക്കുലേഷൻ വിഭാഗത്തിൽ താൽക്കാലികാടിസ്ഥാനത്തിൽ ജോലി ചെയ്യുന്നയാളുടെ വ്യക്തിപരമായ ഫേസ് ബുക്ക് അക്കൗണ്ടിൽ നിന്നും മനോരമ ചാനലിലെ മാധ്യമ പ്രവർത്തകയെ വ്യക്തിപരമായി അധിക്ഷേപിക്കുന്ന പോസ്റ്റിട്ടതു ശ്രദ്ധയിൽപ്പെടുകയുണ്ടായി. ഇത്തരം രീതികളോട് ദേശാഭിമാനിക്ക് യോജിപ്പില്ല. ദേശാഭിമാനിയുടെ പേജിൽ നിന്നല്ലെങ്കിൽ പോലും പത്രവുമായി ബന്ധപ്പെട്ട് പ്രവർത്തിക്കുന്നവരുടെ ഭാഗത്തു നിന്നു മാത്രമല്ല ആരിൽ നിന്നും ഇത്തരം പ്രവണതകൾ ഉണ്ടാകാൻ പാടില്ലെന്നതാണ് സമീപനം. ഇതു സബന്ധിച്ച് ആ വ്യക്തിയോട് വിശദീകരണം ചുമതലപ്പെട്ടവർ ചോദിച്ചിട്ടുണ്ട്. ഇന്നലെ തന്നെ അത് ഡിലിറ്റ് ചെയ്തതായാണ് മനസിലാക്കിയത് ‘

രാഷ്ട്രീയമായ വിമർശനങ്ങളാകാം. വ്യക്തിപരമായ അധിക്ഷേപവും സ്വകാര്യതകളിലേക്കുള്ള നുഴഞ്ഞുകയറ്റവും ആധുനിക സമൂഹത്തിനു യോജിക്കുന്നതല്ല. മോർഫിങ്ങുകളും നിർമ്മിത കഥകളും വഴി പാർടി നേതാക്കളെ മാത്രമല്ല കുടുംബാംഗങ്ങളെ വരെ വ്യക്തിഹത്യ ചെയ്യുന്ന രീതി സാമൂഹ്യ മാധ്യമങ്ങളിലൂടെ എതിരാളികൾ നടത്തുന്നുണ്ടെങ്കിലും ഞങ്ങൾക്ക് അത്തരം രീതികളോട് യോജിപ്പില്ല. വ്യക്തി അധിക്ഷേപ രീതികളെ ഞങ്ങൾ തള്ളിപ്പറയുന്നു.