ദോഹ: ഖത്തറില്‍ മലയാളികള്‍ ഉള്‍പെടെ നിരവധി വിദേശികള്‍ക്ക് തൊഴില്‍ നഷ്ടമാകും. സര്‍ക്കാര്‍ മേഖലയിലേക്കുള്ള പുതിയ നിയമനങ്ങളും പിരിച്ചുവിടല്‍ പട്ടികയും അടുത്തയാഴ്ച മുതല്‍ അയച്ചു തുടങ്ങും. പട്ടിക പൂര്‍ത്തിയാവുന്നതോടെരാജ്യത്തെ വിവിധ സര്‍ക്കാര്‍ അര്‍ധ സര്‍ക്കാര്‍ സ്ഥാപനങ്ങളില്‍ ജോലി ചെയ്യുന്ന മലയാളികള്‍ ഉള്‍പെടെയുള്ള വിദേശ തൊഴിലാളികള്‍ക്ക് അടുത്തയാഴ്ചയോടെ പിരിച്ചു വിടല്‍ ഉത്തരവ് ലഭിച്ചേക്കുമെന്നാണ് സൂചന.ഇതിനിടെ പ്രാഥമികാരോഗ്യ കേന്ദ്രങ്ങളില്‍ ജോലി ചെയ്യുന്ന നിരവധി പേര്‍ക്ക് പിരിച്ചുവിടല്‍ നോട്ടീസ് ലഭിച്ചു തുടങ്ങി.

പൊതുബജറ്റ് പ്രഖ്യാപനത്തെ തുടര്‍ന്നാണ് പുതിയ നിയമനഉത്തരവുകള്‍ വേഗത്തിലാക്കാന്‍ സര്‍ക്കാര്‍ ശ്രമം തുടങ്ങിയത്. ബജറ്റ് പ്രഖ്യാപനം വരുന്നതു വരെ പുതിയ നിയമനങ്ങളും തൊഴില്‍ ഒഴിവുകള്‍ നികത്തുന്നതും മന്ത്രാലയങ്ങളും സര്‍ക്കാര്‍ വകുപ്പുകളും നീട്ടിവെക്കുകയായിരുന്നു. ഭരണ വികസന കാര്യ മന്ത്രാലയത്തിന് ലഭിക്കുന്ന ലിസ്റ്റുകള്‍ക്കനുസരിച്ചായിരിക്കും സ്വദേശികളുടെ നിയമനവും പ്രവാസി തൊഴിലാളികളുടെ പിരിച്ചു വിടലും നടക്കുക.

ഉമറുബ്‌നുല്‍ ഖത്താബ് ഹെല്‍ത്ത് സെന്ററിലെ മലയാളികള്‍ ഉള്‍പെടെ 12 പേര്‍ക്ക് ഇന്നലെ പിരിച്ചു വിടല്‍ നോട്ടീസ് ലഭിച്ചിട്ടുണ്ട്. വിവിധ പ്രൈമറി ഹെല്‍ത്ത് സെന്ററുകളിലെ താഴ്ന്ന തസ്തികകളില്‍ ജോലി ചെയ്യുന്ന 450 ഓളം തൊഴിലാളികളെയും ഉടന്‍ പിരിച്ചു വിടുമെന്നാണ് അനൌദ്യോഗിക വിവരം.

Loading...

രാജ്യത്തെ പ്രമുഖ എണ്ണക്കമ്പനികളില്‍ ജോലി ചെയ്യുന്ന ആയിരക്കണക്കിന് തൊഴിലാളികളെ ഈയിടെ ജോലിയില്‍ നിന്ന് പിരിച്ചു വിട്ടിരുന്നു. ഇതിനു പിറകെ സര്‍ക്കാരിന് കീഴിലുള്ള മറ്റ് വകുപ്പുകളിലും മന്ത്രാലയങ്ങളിലും കൂടി പിരിച്ചു വിടല്‍ വ്യാപകമാവുന്നതോടെ നിരവധി മലയാളികള്‍ സമീപ ഭാവിയില്‍ നാട്ടിലേക്ക് മടങ്ങേണ്ടി വരുമെന്നാണ് സൂചന.