കൊച്ചി: ഓൺലൈൻ പെൺവാണിഭക്കേസിൽ പ്രതികളായ രാഹുൽ പശുപാലനും ഭാര്യ രശ്മി. ആർ. നായർക്കും ഹൈക്കോടതി കർശന ഉപാധികളോടെ ജാമ്യം അനുവദിച്ചു. തിരുവനന്തപുരത്തെ സൈബർ പൊലീസ് സ്റ്റേഷൻ പ്രതികൾക്കെതിരെ ഇനിയും അന്തിമ റിപ്പോർട്ട് നൽകിയിട്ടില്ല. ഈ കേസിൽ സമയബന്ധിതമായി അന്വേഷണ സംഘം അന്തിമ റിപ്പോർട്ട് കോടതിയിൽ സമർപ്പിക്കാത്ത സാഹചര്യത്തിലാണ് ജസ്റ്റിസ് സുനിൽ തോമസ് ഇരുവർക്കും ജാമ്യം അനുവദിച്ചത്.

പ്രായപൂർത്തിയാകാത്ത പെൺകുട്ടികളുടെയുൾപ്പെടെ അശ്‌ളീല ചിത്രങ്ങൾ വെബ്‌സൈറ്റ് വഴി പ്രചരിപ്പിച്ചു പെൺവാണിഭം നടത്തിയ കേസിൽ രാഹുലിനെയും രശ്മിയെയും കഴിഞ്ഞ നവംബർ 18 നാണ് പൊലീസ് ഇവരെ അറസ്റ്റു ചെയ്തത്. ക്രിമിനൽ കേസുകളിൽ അറസ്റ്റ് രേഖപ്പെടുത്തി 90 ദിവസത്തിനുള്ളിൽ അന്തിമ റിപ്പോർട്ട് കോടതിയിൽ സമർപ്പിക്കാൻ കഴിഞ്ഞില്ലെങ്കിൽ പ്രതികൾക്ക് ജാമ്യം അനുവദിക്കാമെന്നാണ് നിയമം. ഈ കേസിൽ തിരുവനന്തപുരത്തെ സൈബർ പൊലീസ് സ്റ്റേഷൻ പ്രതികൾക്കെതിരെ ഇനിയും അന്തിമ റിപ്പോർട്ട് നൽകിയിട്ടില്ല. ഈ സാഹചര്യത്തിലാണ് ഹൈക്കോടതി രാഹുലിനും രശ്മിക്കും ജാമ്യം അനുവദിച്ചത്.

75,000 രൂപയുടെ ബോണ്ടും രണ്ട് ആൾജാമ്യവുമാണ് പ്രധാന വ്യവസ്ഥ. കൂടാതെ ലൈംഗിക സ്വഭാവമുള്ള കമന്റുകളോ വെബ്‌സൈറ്റ് പോസ്റ്റുകളോ പ്രചരിപ്പിക്കരുതെന്ന വ്യവസ്ഥയും ജാമ്യത്തിൽ ഉൾപ്പെടുത്തിയിട്ടുണ്ട്. പാസ്‌പോർട്ട് ഉണ്ടെങ്കിൽ ഹാജരാക്കണം, എല്ലാ തിങ്കളാഴ്ചയും ശനിയാഴ്ചയും അന്വേഷണ ഉദ്യോഗസ്ഥൻ മുമ്പാകെ ഹാജരാക്കണം, കോടതിയിൽ ഹാജരാകാനല്ലാതെ സംസ്ഥാനത്തിനു പുറത്തേക്ക് പോകരുത്, സാക്ഷികളെയും കേസിലെ പരാതിക്കാരെയും സ്വാധീനിക്കാനോ തെളിവു നശിപ്പിക്കാനോ ശ്രമിക്കരുത് എന്നിങ്ങനെയുള്ള വ്യവസ്ഥകളും ജാമ്യത്തിൽ ഉൾപ്പെടുത്തിയിട്ടുണ്ട്.