ഐശ്വര്യയെ ഈയൊരു ഉദ്യമത്തിന് പ്രേരിപ്പിച്ചത് ഒളിച്ചു നിന്നു കേട്ട ആ സംഭാഷണം

മുംബൈ: കഴിഞ്ഞ ഏതാനും ദിവസമായി സോഷ്യല്‍ മീഡിയയിലെ ചര്‍ച്ചാവിഷയം ഐശ്വര്യ എന്ന യുവതിയുടെ കുറിപ്പാണ്. മുംബൈയില്‍ എവിടെയോ ഇരിക്കുന്ന സുപ്രിയ എന്ന യുവതിയെ തേടിയുള്ള ഫേസ്ബുക്ക് പോസ്റ്റായിരുന്നു അത്.മുംബൈയില്‍ എവിടെയോ ഉള്ള സുപ്രിയയെ തന്റെ കാമുകന്‍ വഞ്ചിച്ചു കൊണ്ടിരിക്കുന്ന സത്യം അറിയിക്കാനാണ് ഐശ്വര്യ സുപ്രിയയെ തേടി ഫേസ്ബുക്കില്‍ പോസ്റ്റിട്ടത്.

വാലന്റൈന്‍സ് ദിനത്തിന്റെ അടുത്തദിവസം അന്ധേരിയില്‍ ഒരു ഹോട്ടലില്‍ ഭക്ഷണം കഴിക്കവേ, രണ്ടു പുരുഷന്മാര്‍ തമ്മിലുള്ള സംഭാഷണം ഐശ്വര്യ കേട്ടു. തന്റെ കാമുകിയായ സുപ്രിയയെ വഞ്ചിച്ചതും മറ്റൊരു സ്ത്രീയുമായുള്ള ബന്ധവും അമന്‍ എന്ന യുവാവ്, സുഹൃത്തിനോടു പങ്കുവയ്ക്കുകയായിരുന്നു. എല്ലാം കേട്ട സുഹൃത്ത്, ‘സാരമില്ല, സുപ്രിയ ഇതു കണ്ടുപിടിക്കില്ല’ എന്നു പറഞ്ഞ് അമനെ ആശ്വസിപ്പിച്ചു. ഇതു കേട്ടതോടെ എല്ലാം സുപ്രിയയെ അറിയിക്കണമെന്ന് ഐശ്വര്യ ശര്‍മ തീരുമാനിച്ചു.

തനിക്കറിയാത്ത ഏതോ ഒരു സുപ്രിയയ്ക്കുവേണ്ടി ഫേസ് ബുക്കില്‍ താനറിഞ്ഞ രഹസ്യം എഴുതുകയാണ് ഐശ്വര്യ ചെയ്തത്. ഐശ്വര്യയുടെ ഫേസ്ബുക്ക് സന്ദേശം ഒട്ടേറെപ്പേര്‍ ഷെയര്‍ ചെയ്തതോടെ ‘സേവ് സുപ്രിയ’ എന്ന ഹാഷ് ടാഗില്‍ സമൂഹമാധ്യമങ്ങളില്‍ പ്രചാരണവും ആരംഭിച്ചു. എന്നാല്‍ വെറും പ്രശസ്തിക്കു വേണ്ടിയുള്ള ഐശ്വര്യയുടെ തട്ടിപ്പാണു പോസ്റ്റെന്ന ആരോപണവും ചിലര്‍ ഉയര്‍ത്തുന്നുണ്ട്.