തമിഴ്‌നാട്ടില്‍ ഹിന്ദിക്കെതിരെ കട്ട പ്രതിഷേധം… കേന്ദ്രസര്‍ക്കാര്‍ ഓഫീസുകളുടെ ബോര്‍ഡുകളിലെ ഹിന്ദി വാക്കുകളില്‍ കറുപ്പടിക്കുന്നു

ഇംഗ്ലീഷിനൊപ്പം പ്രാദേശിക ഭാഷയും ദേശീയ ഭാഷയായ ഹിന്ദിയും ഉള്‍പ്പെടുന്ന ത്രിഭാഷാ പദ്ധതി നടപ്പാക്കണമെന്ന
പുതിയ വിദ്യാഭ്യാസ നയത്തിന്റെ കരടിലെ നിര്‍ദേശം പിന്‍വലിച്ചിട്ടും തമിഴ്‌നാട്ടില്‍ പ്രതിഷേധം അവസാനിക്കുന്നില്ല. കേന്ദ്രസര്‍ക്കാര്‍ ഓഫീസുകളുടെ ബോര്‍ഡുകളിലെ ഹിന്ദി വാക്കുകളില്‍ കറുപ്പടിച്ച് പ്രതിഷേധം തുടരുകയാണ് പലയിടങ്ങളിലും.

ഇന്നലെ തിരുച്ചിറപ്പള്ളിയിലെ ബിഎസ്എന്‍എല്‍, എയര്‍പോര്‍ട്ട് എന്നിവയുടെ ബോര്‍ഡുകളിലെ ഹിന്ദി വാക്കുകള്‍ക്ക് മേലാണ് കറുപ്പടിച്ചത്. ഇംഗ്ലീഷ് വാക്കുകള്‍ക്ക് മേല്‍ ഒന്നും ചെയ്തിട്ടില്ല. സംഭവത്തില്‍ പൊലീസ് കേസ് രജിസ്റ്റര്‍ ചെയ്തിട്ടുണ്ട്.

കേന്ദ്രസര്‍ക്കാര്‍ നീക്കത്തിനെതിരെ തമിഴ്‌നാട്ടിലും വ്യാപക പ്രതിഷേധം ഉയര്‍ന്നിരുന്നു. തമിഴ്നാട്ടുകാരുടെ രക്തത്തില്‍ ഹിന്ദിയ്ക്ക് യാതൊരു സ്ഥാനവുമില്ലെന്ന് ഡി.എം.കെ നേതാവ് എം.കെ സ്റ്റാലിന്‍ പറഞ്ഞിരുന്നു.

തമിഴ്നാട്ടുകാര്‍ക്കുമേല്‍ ഹിന്ദി അടിച്ചേല്‍പ്പിക്കുന്നത് തേനീച്ചക്കൂട്ടിനുനേരെ കല്ലെറിയുന്നതിനു തുല്യമാണെന്നും സ്റ്റാലിന്‍ മുന്നറിയിപ്പു നല്‍കിയിരുന്നു.