അദ്ധ്യാപികയുടെ ശരീരത്തിലൂടെ ലോറി കയറിയിറങ്ങി,ഭയപ്പെടുത്തിയ അപകടം

അമിത വേഗത്തിൽ വന്ന ലോറിയുടെ അടിയിൽ പെട്ട് അദ്ധ്യാപികക്ക് ദാരുണാന്ത്യം.ഇന്നു രാവിലെ 8.15-ന് എംജി യൂണിവേഴ്‌സിറ്റി ബസ്‌സ്‌റ്റോപ്പിലാണ് അപകടം. മേരിമൗണ്ട് സ്കൂള്‍ അധ്യാപികയും മാന്നാനം മുത്തേടം (കല്ലുവെട്ടാംകുഴി) ഷാജി മാത്യുവിന്റെ ഭാര്യയുമായ ലീന(42)യാണ് മരിച്ചത്.
ഭര്‍ത്താവ് ഷാജിയാണ് സ്കൂട്ടര്‍ ഓടിച്ചിരുന്നത്. ലീനയെ സ്കൂളില്‍ കൊണ്ടാക്കുന്നതിനു പോകുകയായിരുന്നു. റോഡിലെ ഹംബില്‍ കയറിയിറങ്ങുകയായിരുന്നതിനാല്‍ സ്കൂട്ടറിനു വേഗം കുറവായിരുന്നു. പിന്നാലെ അമിതവേഗത്തില്‍ പാഞ്ഞെത്തിയ ടോറസ് ലോറി വേഗം കുറയ്ക്കാതെ ഹംബില്‍ കയറിയിറങ്ങുകയും സ്കൂട്ടറില്‍ തട്ടുകയുമായിരുന്നുവെന്ന് ദൃക്‌സാക്ഷികള്‍ പറഞ്ഞു.
ലോറി തട്ടിയതിനെത്തുടര്‍ന്ന് സ്കൂട്ടര്‍ മറിയുകയും ഷാജി ഇടതുവശത്ത് റോഡരികിലേക്കു വീഴുകയും ലീന വലതുവശത്ത് റോഡിലേക്ക് തെറിച്ചുവീഴുകയും ചെയ്തു. തൊട്ടടുത്തനിമിഷം ലോറി ലീനയുടെ ശരീരത്തിലൂടെ കയറിയിറങ്ങി. ലീനയുടെ വയറിലൂടെ കയറിയിറങ്ങിയ ലോറി പിന്നോട്ടെടുത്തപ്പോള്‍ വീണ്ടും ശരീരത്തിലൂടെ കയറിയിറങ്ങി. തല്‍ക്ഷണം മരണം സംഭവിച്ചു.റോഡിലേക്കു തെറിച്ചുവീണ ഷാജി ചാടിയെണീറ്റ് നോക്കുമ്പോള്‍ കണ്ടത് ലീനയുടെ ചതഞ്ഞരഞ്ഞ ശരീരമാണ്. ദാരുണരംഗം കണ്ട് നടുങ്ങിവിറച്ചു.കോഴിക്കോട് നാട്ടുപറമ്പില്‍ കുടുംബാംഗമാണ് ലീന. മക്കള്‍: എബി, ആല്‍ബി (ഇരുവരും മാന്നാനം സെന്റ് എഫ്രേംസ് ഹയര്‍സെക്കന്‍ഡറി സ്കൂള്‍ വിദ്യാര്‍ഥികള്‍)