കോഴിക്കോട്, കോട്ടപ്പറമ്പ് സര്ക്കാര് ആശുപത്രിയില് ശസ്ത്രക്രിയക്കായി എത്തിയ യുവതിയെ ലൈംഗികമായി പീഡിപ്പിച്ചെന്ന് പരാതി. സംഭവത്തില് ആശുപത്രിയിലെ രണ്ടു ജീവനക്കാരെ ഡിഎംഒ സസ്പെന്ഡ് ചെയ്തു.
യുവതി തനിക്ക് രേഖാ മൂലം നല്കിയ പരാതി പ്രതികളുടെ സമ്മര്ദ്ധത്തെ തുടര്ന്ന് പിന്വലിച്ചെന്ന് ആശുപത്രി സൂപ്രണ്ട് മോഹനന് മീഡിയാവണിനോട് പറഞ്ഞു. ഈ മാസം 18നാണ് സംഭവം നടന്നത്. പ്രസവം നിര്ത്താനുള്ള ശസ്ത്രക്രിയക്ക് ശേഷം ഓപ്പറേഷന് തിയറ്ററില് അര്ദ്ധ ബോധാവസ്ഥയില് കിടന്ന യുവതിയെ രണ്ട് ജീവനക്കാര് ചേര്ന്ന് ലൈംഗികമായി പീഡിപ്പിച്ചെന്നാണ് പരാതി.
പരാതി രേഖാ മൂലം ആശുപത്രി സൂപ്രണ്ടിന് യുവതി എഴുതി നല്കിയെങ്കിലും കുറ്റാരോപിതരായ ജീവനക്കാരുടെ സമ്മര്ദ്ദം മൂലം പിന്വലിച്ചു. ആരോപണ വിധേയരായ രണ്ടു ജീവനക്കാരെ സസ്പെന്ഡ് ചെയ്യണമെന്ന നിബന്ധന വെച്ചാണ് രണ്ട് ദിവസങ്ങള്ക്ക് ശേഷം യുവതി പരാതി പിന്വലിച്ചത്. തുടര്ന്നാണ് നഴ്സിംഗ് അസിസ്റ്റന്റ് ദേവരാജനെയും അറ്റന്ഡര് ഡെന്സില് പെരേരയെയും ജില്ലാ മെഡിക്കല് ഓഫീസര് സസ്പെന്ഡ് ചെയ്തത്. ഈ സംഭവങ്ങളെല്ലാം ആശുപത്രി സൂപ്രണ്ട് മോഹനന് മീഡിയാവണിനോട് സ്ഥിരീകരിച്ചു. ലൈംഗികമായി പീഡിപ്പിക്കപ്പെട്ടുവെന്ന് വ്യക്തമാക്കുന്ന യുവതിയുടെ രേഖാ മൂലമുള്ള പരാതി ലഭിച്ചയുടന് പൊലീസിന് കൈമാറാനുള്ള ബാധ്യത ആശുപത്രി സൂപ്രണ്ടിനുണ്ട്. ഈ ബാധ്യത നിര്വ്വഹിക്കുന്നതില് ആശുപത്രി സൂപ്രണ്ട് ഗുരുതര വീഴ്ചയാണ് വരുത്തിയത്.